«2-րդ եռամսյակը ներառում էր խորհրդարանական ընտրությունները, իսկ 3-րդը՝ տեղական ինքնակառավարման մարմինների ընտրությունները: Մեր հետազոտությունների համաձայն, ընտրությունների ժամանակաշրջանում ճնշումները սաստկանում են լրագրողների եւ լրատվամիջոցների նկատմամբ: Ցավոք սրտի այս ընտրություններն էլ բացառություն չդարձան եւ սեպտեմբերի 9-ին եւ 21-ին քարոզարշավի ժամանակ արձանագրվեց 5 դեպք, որից մեկը ֆիզիկական բռնություն է,մնացած 4-ը տեղեկություններ ստանալու եւ տարածելու իրավունքի խախտում»,- լրագրողների հետ հանդիպման ժամանակ «ԽԱՊԿ 2012թ. 3-րդ եռամսյակային զեկույցը /հուլիս-սեպտեմբեր/ Հայաստանում խոսքի ազատության վիճակի եւ ԶԼՄ-ների իրավունքների խախտումների մասին», ներկայացրեց Խոսքի ազատության պաշտպանության կոմիտեի նախագահ Աշոտ Մելիքյանը:
Նրա համոզմամբ 2012 թվականի առանձնահատկություններից մեկն այն է, որ նվազել է լրատվամիջոցների դեմ ներկայացվող հայցերի քանակը: Եթե 2011թ.-ի 9 ամիսների ընթացքում դատարան է ներկայացվել 25 հայց՝ ընդդեմ լրատվամիջոցների, ապա այս տարվա 9 ամիսների ընթացքում արձանագրվել են 10 հայցեր: 10 հայցերից 4-ը արձանագրված են 3-րդ եռամսյակում:
«Սովորաբար զեկույցներում մենք ունենք մեր դասակարգումը՝ ֆիզիկական բռնություններ լրագրողների նկատմամբ, ճնշումներ լրատվամիջոցների ու աշխատակիցների նկատմամբ եւ տեղեկություններ ստանալու ու տարածելու իրավունքի խախտում: Այս ժամանակաշրջանում արձանագրվել է մեկ դեպք, որը տեղի է ունեցել տեղական ինքնակառավարման մարմինների ընտրությունների ժամանակ՝ Գյումրիում «Ցայգ» հեռուստաընկերության հանդեպ 34/73 ընտրատեղամասում կիրառվել է ֆիզիկական բռնություն»,-ասաց պրն. Մելիքյանը:
Սեպտեմբերի 9-ը եւ 23-ը առատ էին, արձանագրվել են բազմաթիվ ճնշման եւ բռնության դեպքեր: Երրորդ եռամսյակում արձանագրվել եւ հայտնաբերվել են 16 խախտում՝ 1-ը ֆիզիկական բռնություն, 9- ը ճնշումների՝ ԶԼՄ-ների եւ աշխատակիցների նկատմամբ եւ 6 միջադեպ՝ տեղեկություններ ստանալու եւ տարածելու իրավունքի խախտում:
Կարդացեք նաև
Բանախոսի խոսքով, նրանք փոքր բաժին են հատկացնում լրատվամիջոցների գործունեության հետ կապված այլ իրադարձություններին. «Երրորդ եռամսյակի պարագայում դա մեկն է, բայց շատ կարեւոր՝ մարդու իրավունքների եվրոպական դատարանն ընդունել է «Հայկական ժամանակ»-ի հայցն ընդդեմ «Հայաստանի Հանրապետության», որը կապված էր 2008 թ.-ի մարտի 1-ից 20-ը հայտարարված արտակարգ իրավիճակում թերթի լույս չընծայման հետ: «Հայկական ժամանակ»-ը պահանջում էր 9 միլիոն դրամ՝ լույս չտեսնելու համար, 20000 եվրո՝ որպես բարոյական վնաս եւ 10000 եվրո՝ որպես փաստաբանական ծառայությունների ծախսեր: Եվրոպական դատարանը ընդունել է եւ ինչ որոշում էլ, որ կայացնի, մենք կհետեւենք այդ գործընթացին»:
Պրն. Մելիքյանը նշեց, որ հեղինակային իրավունքների խախտումներ եղել են եւ շատ, իսկ հետազոտությունները ապացուցել են, որ ընտրությունների ժամանակ իրավիճակը սրվում է. «Սովորաբար իրավիճակը ալիքաձեւ է ընթանում, լինում են հանդարտ եւ ծանր ժամանակաշրջաններ: 2011 թ.-ին ֆիզիկական բռնությունների քանակը նվազել էր, սակայն ավելացել էր դատական հայցերի քանակը: Լրատվամիջոցների ղեկավարներից մեկը ինձ ասաց, որ ավելի լավ է իր գլուխը ջարդեն, քան թե 3 միլիոն դրամ տուգանեն: Հանգամանքները տարբեր են լինում: Առաջին եռամսյակը հանդարտ էր, բայց ահա եկան ընտրությունները եւ եղան բռնություններ եւ ճնշումներ: Ամեն եռամսյակ իր յուրահատկություններն ունի»:
Անժելա ՇԱՀՈՒՄՅԱՆ
