Այսօր` հոկտեմբերի 22-ին, արտակարգ դեպք է տեղի ունեցել Կոտայքի մարզում: Ժամը 05:40-ի սահմաններում «Օպել» մակնիշի 33 ՏD 754 համարանիշի ավտոմեքենայի վարորդը Երևան-Սևան ավտոճանապարհի 41-րդ կմ-ին դուրս է եկել ճանապարհի երթևեկելի գոտուց, բախվել ծառերին և 20 մետր գլորվելով` գլխիվայր շրջվել:
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդը մոտ 10 մետր ավտոմեքենայից դուրս է շպրտվել և տեղում մահացել: Ավտոմեքենայի` ծառերին հարվածելու հետևանքով հաստաբուն ծառը արմատախիլ էր եղել և մի քանի տեղից կոտրվել, իսկ ավտոմեքենայում առաջացել է հրդեհ, ինչի հետևանքով ավտոմեքենան ամբողջովին մոխրացել է:
Վթարի վայր է ժամանել Ճանապարհային ոստիկանության 2-րդ սպայական գումարտակի հրամանատար, ոստիկանության փոխգնդապետ Արսեն Արշակյանը:
Տեղում էին նաև ՀՀ Արտակարգ իրավիճակների նախարարության Հայաստանի փրկարար ծառայության Կոտայքի մարզի փրկարար վարչության Հրազդան քաղաքի հրշեջ-փրկարարական ջոկատը` մեկ մարտական հաշվարկով:
Կարդացեք նաև
Վթարի վայրում քննչական աշխատանքները ղեկավարում էր Ոստիկանության քննչական գլխավոր վարչության Կոտայքի մարզի քննչական բաժնի քննիչ Արկադի Ղումաշյանը:
Քննիչի հանձնարարականով, ավտոմեքենան տեղափոխվեց Ոստիկանության Հրազդանի բաժնի հատուկ պահպանման տարածք:
Գ. Շամշյանը հայտնում է, որ նշված ավտոմեքենան հաշվառված է Երևան Արաբկիր վարչական շրջանի Բարբուսի 63 շենքի բնակիչ, 55-ամյա Միխայել Գրիգորյանի անվամբ:
Այս պահին Ոստիկանությունը փորձում է պարզել մահացած վարորդի ինքնությունը:
Լուսանկարը` Գագիկ Շամշյանի
