Մանկապատանեկան ֆիլմերի 8-րդ միջազգային փառատոնի շրջանակում երեկ «Մոսկվա» կինոթատրոնում տեղի ունեցավ «Ես ձեզանից մեկն եմ» խորագրով հաշմանդամություն ունեցող երեխաների նկարչական աշխատանքների ցուցահանդեսը:
Aravot.am-ի հետ զրույցում Հայաստանի «Ռոլան Բիկով» հիմնադրամի նախագահ, փառատոնի տնօրեն Նունե Մանուկյանն ասաց, որ արդեն երրորդ տարին է` փառատոնը համագործակցում է ՄԱԿ-ի մանկական հիմնադրամի հետ եւ իրականացնում «Ես իրավունքներ ունեմ» ծրագիրը. «Այս տարի նախաձեռնության ներքո գործում է «Ես ձեզանից մեկն եմ» ծրագիրը, որը նվիրված է հաշմանդամություն ունեցող երեխաների ինտեգրացման խնդրին: Դա չափազանց կարեւոր է, քանի որ այդ երեխաներն իրապես մեզանից մեկն են: Մենք պետք է սովորենք նրանց տեսնել ամեն տեղ, եւ մեր երեխաներին էլ սովորեցնենք, որ թեեւ նրանք ունեն ֆիզիկական ինչ-ինչ թերություններ, բայց հասարակության լիարժեք անդամներ են»:
Տիկին Մակուկյանը նշեց, որ սահմանափակ են հաշմանդամություն ունեցող երեխաների շփումները. «Նրանք շփվում են իրենց պես երեխաների հետ, իսկ մեր խնդիրն այն է, որ նրանք շփվեն բոլոր երեխաների հետ: Բացի այդ, պետք է լուծվի հաշմանդամություն ունեցող երեխաների` դպրոցական դասարաններում ներգրավվածության խնդիրը: Համամարդկային առումով յուրաքանչյուր երեխա հանրության լիիրավ անդամ լինելու իրավունք ունի»:
Ցուցահանդեսի մասնակից «Փիլատելփիա» հաշմանդամ երեխաների հասարակական կազմակերպության նախագահ Հովիկ Իսրայելյանի խոսքով` սահմանափակ կարողություններով երեխաներն առաջնահերթ ունեն տեղաշարժվելու, թերսնվածության եւ դեղորայքի հետ կապված խնդիրներ. «Նման սոցիալական հարցերը լուծելու համար լուրջ գումարներ են պետք: Եթե չլինեին կամավոր ներդրումները եւ արտերկրի մեր հայրենակիցների օգնությունը, ծանր խնդիրներ կառաջանային: Միաժամանակ, այդ ճանապարհին հաշմանդամ ծնվող երեխաների թիվը նվազել է` բժշկական նորագույն հետազոտությունների եւ տեխնոլոգիաների շնորհիվ»:
«Երեխաների հատուկ ստեղծագործական կենտրոն ՊՈԱԿ»-ի տնօրեն Աիդա Մելքոնյանն ասաց, որ ՊՈԱԿԻ տարբեր խմբերում ներգրավված սոցիալապես անապահով եւ հաշմանդամի կարգավիճակ ունեցող երեխաները ստեղծագործում են միասին. «Նրանք չեն տարբերվում մյուս երեխաներից, տաղանդավոր են, շնորհալի եւ իրավունք ունեն ստեղծագործել ու սովորել: Իսկ հենաշարժիչ համակարգի խնդիրներ ունեցող երեխաներն առաջնահերթ ունեն տեժաշարժման եւ դպրոցում կրթություն ստանալու, մշակութային օջախներ հաճախելու խնդիրներ»:
Լուիզա ՍՈՒՔԻԱՍՅԱՆ
