Այսօր «Մոսկվա» կինոթատրոնում տեղի ունեցավ Մանկապատանեկան ֆիլմերի 8-րդ միջազգային փառատոնի բացման հանդիսավոր արարողությունը: Մինչ մեկնարկը Շառլ Ազնավուրի անվան հրապարակում փառատոնի մասնակիցները հանդես եկան ազգային պարերով: «Այս տարի ցանկացանք փառատոնի հյուրերին դիմավորել մեր ազգային պարերով, բացի այդ` շեշտը դրվում է այն հանգամանքի վրա, որ միջազգային ֆիլմեր դիտելով հանդերձ` պետք չէ անտեսել մեր ազգայինը: Այն, ինչ մերն է, չենք մոռանում. ի վերջո` պետք է դաստիարակել այնպիսի մարդ, որը կընդունի ոչ միայն հարեւանի մշակույթը, այլեւ կպահպանի իրենը»,- Aravot.am-ի հետ զրույցում ասաց փառատոնի գեղարվեստական ծրագրերի տնօրեն Նելլի Ալելովան:
Հիշեցնենք, որ փառատոնի «Ես ձեզանից մեկն եմ» խորագրով ծրագիրը կբարձրաձայնի հաշմանդամություն ունեցող երեխաների իրավունքների մասին: «Մոսկվա» կինոթատրոնի կարմիր դահլիճում փառատոնի բացմանը մասնակցեց տեղաշարժվելու խնդիրներ ունեցող 14-ամյա Մարգարիտա Սարգսյանը. «Ուրախ եմ փառատոնին մասնակցելու եւ բացումն անելու համար: Դա կարեւոր է եւ մեծ ուժ է տալիս ինձ: Երբ մարդիկ ինձ խնդրում են որեւէ բան անել, նշանակում է, որ ես կարող եմ դա: Մի նայեք միայն իմ սայլակին, ես ձեզանից մեկն եմ: Ինչպես բոլոր երեխաները, ես երազում եմ խաղալ, ճանապարհորդել: Ես դպրոց եմ գնում եւ շատ ընկերներ ունեմ: Իմ շրջապատում կան մարդիկ, ովքեր աջակցում եւ հավատում են ինձ»,-ասաց աղջնակն ու հավելեց, որ փառատոնում ներառված են նաեւ իր պես երեխաների մասին ֆիլմեր. «Պարզապես ես մի փոքր տարբերվում են ձեզանից, բայց եկեք միասին լինենք»:
Փառատոնի աջակից ՅՈՒՆԻՍԵՖ-ի հայաստանյան գրասենյակի եւ ՄԱԿ-ի մանկական հիմնադրամի ներկայացուցիչ Հենրիետ Արենսը փառատոնը կարեւորեց հատկապես երեխաների իրավունքների պաշտպանվածությանն ուղղված ծրագրի մասով. «Նախորդ փառատոնի ընթացքում խոսվեց երեխաների ապրելու եւ ընտանիքում հասակ առնելու իրավունքից, իսկ այս անգամ շեշտը դրվում է երեխայի` մեզանից մեկը լինելու եւ դպրոցում սովորելու իրավունքների վրա: Մենք հաճախ չենք նկատում նրանց, չենք շփվում եւ չգիտենք, թե ինչպիսի կարողություններ ունեն այդ երեխաները»:
Կարդացեք նաև
Հայաստանի «Ռոլան Բիկով» հիմնադրամի նախագահ, Մանկապատանեկան ֆիլմերի 8-րդ միջազգային փառատոնի տնօրեն Նունե Մանուկյանը նկատեց, որ փառատոնների միջեւ ընկած ժամանակահատվածն անցնում է ակնթարթի պես. «Կարեւոր է, որ այս տարի ներառված են նաեւ նոր ծրագրեր եւ մտահաղացումներ: Ուրախ եմ, որ փառատոնի մեկնարկը միասին ենք կատարում` բարի գալուստ ասելով մեր բոլոր հյուրերին»:
Տիկին Մանուկյանը հայտնեց, որ ռեժիսոր Բորիս Գրաչեւսկիի ընտանիքում վերջերս երեխա է ծնվել, եւ ռեժիսորը չի կարողացել ժամանել. «Բայց նա խոստացել է հաջորդ փառատոնին մասնակցել արդեն ընտանիքով: Գրաչեւսկին մեզ նվիրել է «Երալաշ» հումորային ծրագրի դեռեւս չցուցադրված մանրապատումները»:
Հավելենք, որ փառատոնում ընդգրկված է աշխարհի 27 երկրի 105 մանկական ֆիլմ:
Լուիզա ՍՈՒՔԻԱՍՅԱՆ
