Իջեւանի տարածաշրջանի Ազատամուտ համայնք
Հոկտեմբերի 22-ին Տավուշի մարզի Բերդ քաղաքում կսկսվի Իջեւանի տարածաշրջանի Ազատամուտ համայնքի ղեկավար Ժորա Մարտիրոսյանի եւ նրա 3 որդիների դատավարությունը: Նրանց բոլորին մեղադրանք է առաջադրված ՀՀ քրեական օրենսգրքի 258 հոդվածով (խուլիգանություն): Մարտիրոսյանները մեղադրվում են այն բանում, որ այս տարվա մարտի 25-ին Ազատամուտում քարերով, բահի կոթերով, անկոթ բահերով, կենցաղային կացնով եւ մետաղական խողովակների կտորներով ծեծի են ենթակել 3 անձանց, նրանց պատճառել մարմնական վնասվածքներ, ապա քարերով ջարդել նրանց տների պատուհանները:
Գյուղապետ Ժորա Մարտիրոսյանը 2006թ. դատապարտվել է նույն՝ խուլիգանության հոդվածով: Գյուղապետի եւ նրա 3 որդիների խափանման միջոց է ընտրված չհեռանալու մասին ստորագրությունը: Շուրջ մեկ ամիս առաջ՝ սեպտեմբերի 23-ին ՀՀԿ անդամ, ՀՀԿ-ի կողմից թեկնածու առաջադրված Ժորա Մարտիրոսյանը վերընտրվել է Ազատամուտ համայնքի ղեկավարի պաշտոնում:
Ոսկան ՍԱՐԳՍՅԱՆ
