Ֆուտբոլի Անգլիայի առաջնության «Շեֆիլդ Ուենսդեյ»-«Լիդս» խաղի 77-րդ րոպեին, երբ հաշիվը 1:1 էր, «Լիդսի» ֆանատներից մեկը մտել է «Հիլսբորո» ստադիոնի խաղադաշտ եւ երկու բռունցքով հարվածել «Լիդսի» դարպասապահ Քրիս Քիրքլենդի դեմքին: Հետաքրքիրն այն է, որ այդ երկրպագու կոչեցյալը կարողացել է փախչել անվտանգության աշխատակիցներից եւ թաքնվել տրիբունաներում:
Անգլիական լրատվամիջոցները գրում են, որ այդ երիտասարդը ներկայումս Անգլիայում ամենաորոնվող հանցագործն է:
Խաղից հետո «Շեֆիլդի» գլխավոր մարզիչ Դեյվ Ջոունսը կտրուկ խոսքեր չի խնայել տեղի ունեցածի մասին: «Դրանք վայրենիներ են, կենդանիներ: Ինչպես ուզում եք, կոչեք: Ես մտածում էի, թե անգլիական ֆուտբոլը ձերբազատվել է այդ ամոթից», – մեջբերում է «The Mirror»-ը:
Գործընկերոջ հետ լիովին համաձայն է եղել նաեւ «Լիդսի» մարզիչ Նիլ Ուորնոքը: «Ցնցված եմ: Զզվելի միջադեպ էր: Այդ տղային հարկավոր է գտնել եւ ուղարկել ամենադաժան բանտ: Նման դեպքերում ես չեմ կարող հպարտանալ, որ գլխավորում եմ «Լիդսը», – հայտարարել է Ուորնոքը:
Աշոտ ՀԱԿՈԲՅԱՆ
