Այսօր հայտնել էինք, որ ՀՀ Գիտությունների ազգային ակադեմիայի նախագահության նիստերի դահլիճում մեկնարկեց Երիտասարդ հայ արվեստաբանների գիտական յոթերորդ նստաշրջանը՝ նվիրված հայ մեծանուն կոմպոզիտոր Տիգրան Չուխաճյանի ծննդյան 175-ամյակին:
ԳԱԱ հայագիտության եւ հասարակական գիտությունների բաժանմունքի ակադեմիկոս-քարտուղար Յուրի Սուվարյանը ասել էր, որ Չուխաճյանի գործերը քիչ են կատարվում, ինչը թուրքերին առիթ է տալիս կոմպոզիտորին ներկայացնել որպես թուրք:
Խնդրի շուրջ թատերագիր, գրականագետ, արվեստի վաստակավոր գործիչ Լեւոն Մութաֆյանը մեզ հետ զրույցում փաստեց, որ թուրքերը Չուխաճյանին չեն ներկայացրել որպես իրենց ազգակից. «1999թ-ին լույս տեսած թուրքալեզու հանրագիտարանը ներկայացնում է Ստամբուլը՝ ըստ թաղամասերի: Ներկայացվել է նաեւ յուրաքանչյուր թաղամասի հայ բնակչությունը, այդ թվում՝ Վահրամ Փափազյան, Պետրոս Ադամյան, Հակոբ Պարոնյան, Տիգրան Չուխաճյան…: Վերջինիս կենսագրության մեջ նշվում է, որ նա ազգությամբ հայ է. կան կաեւ լուսանկարներ»:
Կարդացեք նաև
Պարոն Մութաֆյանը համաձայն չէ նաեւ ակադեմիկոսի այն կարծիքի հետ, թե Չուխաճյանի գործերը բավականաչափ չեն կատարվում. «Նրա կատարյալ ստեղծագործությունները միշտ առկա են Օպերայի եւ բալետի թատրոնի խաղացանկում, մասնավորապես՝ «Լեբլեբիջի Հոր-հոր աղա» օպերետը: Դա նույն «Կարինե» ներկայացումն է, որը վերջերս ցուցադրվեց Կամերային երաժշտության տանը: Իսկ այս պահին Պարոնյանի անվան թատրոնում պատրաստվում է նույն «Կարինե» օպերետը»:
Յուրի Սուվարյանը կարծիք էր հայտնել, որ ներկայումս հայ թատերագիտությունը պասիվ դիրքում է: Այս հարցի վերաբերյալ Լեւոն Մութաֆյանն ասաց, որ առկա է թատերագիտական կրթության պակասավորություն. «Մշակված չեն թատերագիտական կրթության հստակ եղանակներ, իսկ Թատրոնի եւ կինոյի պետական ինստիտուտում թատերագիտական կուրսերը ղեկավարում են նախկինում դերասանական եւ ռեժիսորական կրթություն ստացած մարդիկ: Բացի այդ, այսօր թատերագիտության համար ներկայանալու ասպարեզ չկա, իսկ ոլորտի հանդեսների ու պարբերականների թիվը չափազանց քիչ է: Բացակայում է նաեւ թատրոն-թատերական քննադատություն կապը»:
Լուիզա ՍՈՒՔԻԱՍՅԱՆ
