Աշունն արդեն լիովին մտել է իր դերի մեջ, վաղուց արդեն ժամանակն է թարմացնել զգեստապահարանը՝ թողնելով այնտեղ միայն ամենանորաձևը, իսկ այդ հարցում ձեզ օգնելու համար «Առավոտ երիտասարդականը» զրուցեց դիզայներ Ֆաինա Հարությունյանի հետ:
Դիզայների խոսքով՝ այս աշնանը նորաձև են սև կաշվից հագուստները, իր նշանակությամբ ու գեղեցկությամբ չի զիջում նաև մորթին: Իսկ այս աշնան գույներն ըստ Ֆաինայի հետևյալն են՝ էլեկտրիկ կապույտ, վառ ոսկեգույն, մուգ գազարագույն, մուգ կանաչ, սև, շոկոլադի գույնին մոտ շագանակագույն և մուգ դեղին:
Իրենց կարևորությամբ աչքի են ընկնում նաև շարֆերը, որոնք լրացնում են հագուստն ու ավելի հետաքրքիր դարձնում այն. «Շարֆերը միշտ էլ նորաձև են, կարևոր է, սակայն, որ համապատասխանի հագուստին», – ասում է Ֆաինան: Խոսելով երիտասարդների հագնվածքի մասին՝ դիզայները շեշտեց, որ իրեն շատ է դուր գալիս այն, ինչ կրում են երիտասարդները: Նրան հատկապես ուրախացնում է այն փաստը, որ սկսել են առաջնորդվել սեփական կարծիքով, և իրենց հագնվածքում օգտագործում են ավելի համարձակ գույներ:
Տիգրանուհի Թասլակյան
