«Տարածաշրջանն արմատական վերափոխումների նախաշեմին է եւ այս ընթացքում գլխավոր խնդիրը, որ պետք է ապահովի հայկական կողմը, դա նախեւառաջ քաղաքական մասնակցությունն է՝ հնարավորինս նախաձեռնողականությամբ եւ երկրորդը՝ ռազմական նախապատրաստակամությունը, որի իրականացման հետ կապված աշխատանքներին մենք ականատես ենք լինում թե Հայաստանի Հանրապետության տարածքում, եւ թե Արցախում»,- այսօր լրագրողների հետ հանդիպման ժամանակ ասաց քաղաքագետ Հրանտ Մելիք-Շահնազարյանը:
Կարեւորելով բանակի դերակատարումը, Մելիք-Շահնազարյանը հատկանշական համարեց «Ռոյթերս» գործակալությանը տված հարցազրույցում նախագահ Սերժ Սարգսյանի այն հայտարարությունը, որ տարածաշրջանում խաղաղությունը պահպանվում է բացառապես հայկական ռազմական ուժերի շնորհիվ. «Սա նաեւ ինչ որ չափով մեղադրանք էր՝ ուղղված միջազգային հանրությանը, որ ձեր գործունեությունը ապացուցում է, որ տարածաշրջանում խաղաղությունը մեր բանակն է ապահովում: Եթե մենք հարցադրումը դնենք այս տեսակետից, որ խաղաղության երաշխիքն ենք տարածաշրջանում, ապա հասկանալի է, որ պատերազմի վերսկսումը կարող է շատ հեռուն տանել… Քանի որ մեր բանակն է տարածաշրջանում ներկայացնում որպես կայունության գլխավոր երաշխիք, հիմք, հետեւաբար սա թույլ է տալիս միջազգային հանրության հետ խոսել այլ դիրքերից, այսինքն ասել, որ մենք կարող ենք կարեւորագույն հարցերը ինքներս լուծել»,-ավելացրեց քաղաքագետը:
Եվա ՀԱԿՈԲՅԱՆ
