Հոկտեմբերի 8-ի համարում տեղեկացրել էինք, որ «Առավոտը» Աղայան 19 եւ Տերյան 54 շենքերի բնակիչներից ահազանգեր է ստացել, թե վերոհիշյալ շենքերի բակում ոմն սեփականատեր ցանկանում է բուտիկներ տեղադրել՝ «հարվածի տակ դնելով» կանաչապատ տարածքը եւ երեխաների համար նախատեսված խաղահրապարակը: Սեփականատեր ներկայացած մի անձ էլ ասել էր, թե աշխատում է քաղաքապետարանում եւ ունի համապատասխան թույլտվություն:
Տեղեկությունը ճշտելու համար մեկնաբանություն խնդրեցինք քաղաքապետարանից եւ ստացանք հետեւյալ գրավոր պատասխանը. «Տեղեկացնում ենք, որ Երեւանի քաղաքապետարանը ստացել է նման հայտ, սակայն այս համատեքստում դեռ քննարկումներ կամ քաղաքապետի որոշում եւ հաստատված նախագիծ չկա»: Քաղաքապետարանի պատասխանի մասին տարածքի բնակիչ Ղուկաս Հարությունյանը մտահոգություն հայտնեց, որ եթե հայտը չի քննարկվել, ուրեմն չի էլ մերժվել. «Եթե առանց քննարկելու մերժեին, այդպես էլ կասեին: Դա նշանակում է, որ կարող են հետագայում թույլտվություն տալ, բայց որոշումից հետո այլեւս ոչինչ չենք կարող փոխել»:
ԼՈՒԻԶԱ ՍՈՒՔԻԱՍՅԱՆ
«Առավոտ» օրաթերթ
