«Արմենտել» ընկերությունն այսօր տնտեսական մրցակցության պաշտպանության պետական հանձնաժողովի (ՏՄՊՊՀ) կողմից տուգանվեց 30 միլիոն դրամով` անբարեխիղճ մրցակցության համար:
«Արմենտելը» «Ալիաս» ընկերությանը տրամադրել է «Էքսկլյուզիվ բիզնես» փաթեթը, որի 1Մգ ինտերնետի սակագինը 49 դրամ է, սակայն որոշ ժամանակ հետո, «Արմենտելը» բաժանորդներից 1Մգ ինտերնետի համար գանձել է 90 դրամ: Ընդ որում, «Արմենտելի» ինտերնետային կայքում էլ տրամադրված փաթեթի վերաբերյալ տեղեկատվությունում եւս նշված է` 1Մգ ինտերնետը` 49 դրամ: «Արմենտելը» ՏՄՊՊՀ-ի ուսումնասիրությունների ընթացքում փորձել է արդարանալ. Վերոնշյալ սպառողները վճարել են ավելի բարձր սակագին, որովհետեւ նրանց նկատմամբ, կիրառվել է «Ինտերնետ բոլորի համար» սակագնային փաթեթը, իսկ որպեսզի բաժանորդներն օգտվեն 1Մգ-ը 49 դրամ «Էքսկլյուզիվ բիզնես» փաթեթից պետք է հատուկ կարգավորումներ կատարեին: Բացի այս, «Արմենտել» ընկերությունը նաեւ պատճառաբանել է, որ հաղորդագրություն է ուղարկել բաժանորդներին եւ զգուշացրել սակագների մասին, սակայն այդ հաղորդագրությունը ուղարկված է եղել «Ալիասի» կողմից փաթեթը ձեռք բերելուց ամիսներ առաջ:
Ըստ ՏՄՊՊՀ-ի «Արմենտելը» մոլորեցրել է սպառողներին եւ անբարեխիղճ գործունեություն ծավալել: Հանձնաժողովի նախագահ Արտակ Շաբոյան էլ հորդորեց այն սպառողներին, որոնք եւս մոլորեցվել են «Արմենտելի» կողմից «Էքսկլյուզիվ բիզնես» փաթեթն օգտագործելիս եւ ավելի բարձր սակագին են վճարել ինտերենտի համար, ապա հանձնաժողովի այս որոշումը կարող են հիմք ընդունել եւ դիմել դատարան:
Կարդացեք նաև
Նելլի ԲԱԲԱՅԱՆ
