Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր, ժ.12-ին նշանակվել էր Վահրամ Մարգարյանի եւ Բորիս Հակոբյանի դեմ հարուցված քրեական գործով հերթական դատական նիստը: Այդ ժամի մասին նշված էր «ԴատաԼեքս» տեղեկատվական համակարգում նաեւ այսօր:
Սակայն պարզվեց, որ դատական տեղեկատվական համակարգի ժամը չի համընկնում դատավոր Արշակ Վարդանյանի կողմից իր նիստը նշանակելու ժամի հետ: Այս նիստը տեղի կունենա այսօր՝ ժ.15-ին:
Արդեն որերորդ անգամ է, ինչ դատական տեղեկատվական համակարգի ժամերը չեն համընկնում դատավորների նշանակած նիստերի ժամերի հետ:
Ի դեպ, գործարար Խաչիկ Գալոյանի սպանության մեջ մեղադրվող Վահրամ Մարգարյանի /Գուրգեն Մարգարյանի եղբոր/ եւ Բորիս Հակոբյանի դեմ հարուցված քրեական գործի դատաքննությունը տեղի կունենա դռնփակ ընթացակարգով: Արդեն երկրորդ անգամ: Պատճառը, ըստ մեր տեղեկությունների, վկա Աշոտ Ֆրանգուլյանի անվտանգության հետ է կապված: Այս վկայի ներկայությունը ցանկացած դատարանում անկանխատեսելի է իր հետեւանքներով: Այս գործով, չնայած Բորիս Հակոբյանը մի քանի անգամ պնդել է, որ ինքն է սպանել գործարարին, լուծելով իր սպանված որդու վրեժը նրանից, սակայն հաստիքային վկան ցուցմունք է տվել, թե Վահրամն է սպանել:
Այս վկայի անվան հետ է կապվում նաեւ մեր գործընկեր, «Հայկական ժամանակ» թերթի խմբագիր Հայկ Գեւորգյանի «ավտովթարի գործով» կեղծ վկայությունը:
