Կառավարությունն առաջարկում է հերթական անգամ երկարաձգել «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքի գործողության ժամկետը: Ըստ այդմ, նախատեսվում է օրենքի գործողությունը տարածել 1992 թ.-ի աշնանային զորակոչից մինչև 2012թ.-ի նոյեմբերի 1-ն ընկած ժամանակահատվածում «Զինապարտության մասին» օրենքի խախտմամբ պարտադիր զինվորական ծառայության զորակոչից խուսափած ու 27 տարին լրացած ՀՀ քաղաքացիների վրա:
Օրենքում փոփոխություն կատարելու մասին այս օրինագիծը ներառված է Ազգային ժողովի Պաշտպանության, ազգային անվտանգության և ներքին գործերի մշտական հանձնաժողովի հոկտեմբերի 19-ի նիստի օրակարգում: Հանձնաժողովը պետք է Ազգային ժողովին եզրակացություն ներկայացնի` հոկտեմբերի 22-25-ի չորսօրյա նիստերի օրակարգի նախագծում ընդգրկվող այս օրինագծի վերաբերյալ:
2011թ.-ի հունիսի 23-ին օրենքում կատարված փոփոխության համաձայն, ներկայումս օրենքը տարածվում է մինչև 2011 թ.-ի մայիսի 1-ը 27 տարին լրացած ՀՀ քաղաքացիների վրա:
2004թ.-ի մարտի 1-ից գործող այս օրենքը հնարավորություն է ընձեռնում զինծառայությունից խուսափած քաղաքացիներին օրենքով սահմանված որոշակի գումար վճարելու դիմաց ազատվել քրեական պատասխանատվությունից և հաշվառվել պահեստազորում:
Նշենք, որ 18-ից մինչև 27 տարեկան բոլոր զորահավաքներից խուսափելու համար վճարի առավելագույն գումարը կազմում է 1 մլն 800 հազար դրամ: Առանձին կատեգորիաների համար նախատեսված են նաև զեղչեր, մասնավորապես, եթե այդ ընթացքում սահմանված կարգի խախտմամբ պարտադիր զինվորական ծառայություն չանցած քաղաքացին սովորել է բուհում, կամ երկու երեխա է ունեցել, կամ ծնողներից մեկը հաշմանդամի կարգ ունի և այլն:
Օրենքի կիրառման արդյունքում ստացած վճարները մուտքագրվում են Հայաստանի պաշտպանության բնագավառում պետական լիազոր մարմնի կողմից այդ նպատակով բացված հատուկ հաշվին և ուղղվում են ռազմատեխնիկական նշանակության ապրանքների ձեռքբերման ծախսերի ֆինանսավորմանը:
