Այսօր «Հայելի» ակումբում ՀՀԿ փոխնախագահ Գալուստ Սահակյանը ԱՄՆ դեսպանի հայտարարության հետ կապված այսպիսի տեսակետ հայտնեց. «ԱՄՆ դեսպանի հայտաարությունը խորացրեց կասկածները: Չինաստանի կամ Ճապոնիայի դեսպանը ինչո՞ւ հայտարարեց: ԱՄՆ-ի պատմության մեջ չի եղել նման բան: Իմիջիայլոց, շատ խորամանկ հայտարարություն էր, նա առաջ էր տանում՝ ինչո՞ւ մյուսներին չէ, այլ մենակ Օսկանյանին: Ես էլ ասում եմ՝ ինչո՞ւ Չինաստանի դեսպանը նման հայտարարություն չարեց: Նախ պետք է տարբերակենք՝ այսօր որեւէ մեկը իրավունք չունի մեղադրել Օսկանյանին: Հասան նրան, որ ասեն՝ Օսկանյանի անձեռնմխելիությունը վերցրեցինք: Օսկանյանից որեւէ բան չի վերցվել, պարզապես որպես մեղադրյալ կցվել է գործին: Նայել բանկային հաշիվները ուրիշ որեւէ մեթոդով չեն կարող: Օսկանյանին լավ եմ ճանաչում, գիտեմ Օսկանյանի չափերը, մոտիվները, դրական իմաստով եմ ասում: Ո՞վ կբերի 2 մլն փող կտա, կասի ոնց ուզում ես՝ բարեգործություն արա: Հայաստանում մենակ Օսկանյա՞նն էր: Բարեգործության համար ծրագիրն էլ են տալիս: Դե թող որեւէ մեկը բերի որեւէ մեկին 200 դոլար տա, ասի ոնց ուզում ես՝ բարեգործություն արա: Կկարողանա՞ ապացուցել Օսկանյանը՝ կա՛մ ներողություն կխնդրեն Օսկանյանից, կամ ինքը պատասխան կտա»:
Հարցին ի պատասխան՝ Օսկանյանին որ ուշադիր նայեք՝ նմա՞ն է հանցագործի՝ Գալուստ Սահակյանը հիշեց ֆիլմ, որտեղ երբեք մարդուն նայելով՝ չէիր ասի, որ հանցագործ է. «Հանցագործը տեսքով չի: Հետո Օսկանյանին որեւէ մեկը չի ասում՝ հանցագործ ես»:
ՀՀԿ խմբակցության պատգամավոր Խոսրով Հարությունյանը կանխատեսել էր, որ այս պատմությունից Վարդան Օսկանյանը դուրս է գալու կորցրած եւ նա դուրս է գալու ԲՀԿ-ից: Aravot.am-ի հարցին՝ այս կանխատեսումն իրատեսակա՞ն է՝ Գալուստ Սահակյանը պատասխանեց. «Չեմ ուզում Օսկանյանը կորցրած դուրս գա: Հիմա ամեն ինչ պետք չի վերագրել Օսկանյանին»:
Կարդացեք նաև
Հարցին՝ հնարավոր համարո՞ւմ եք, որ Գագիկ Ծառուկյանն առաջադրի իր թեկնածությունը՝ պրն Սահակյանը պատասխանեց, որ այս տարիների ընթացքում նա ձգտում չի ունեցել, որ պետական չինովնիկ լինի՝ նախագահ կամ վարչապետ լինի: Ինչ վերաբերում է Վարդան Օսկանյանին՝ Գալուստ Սահակյանը պատասխանեց, որ Օսկանյանին առավել եւս չի տեսնում այդ դերում:
Հռիփսիմե ՋԵԲԵՋՅԱՆ
