Հատված ՀՀԿ խմբակցության պատգամավոր Համլետ Հարությունյանի հարցազրույցից:
– Էս երկիրը մեր երկիրն է, որտեղ կոնտրաստն ամեն քայլափոխի աչք է ծակում, և մեր բոլորի աչքն ու ականջը տեղն են։ Ի՞նչ եք կարծում, արդյո՞ք Օսկանյանը ձկան այն մեծ գլուխն է, որից սկսվում է կոռուպցիայի դեմ պայքարը։
– Ուրեմն ասեմ, որ էդ բեմադրության հեղինակը մենք չենք։ Իրենք բերեցին ու Օսկանյանին վարի տվեցին, որպեսզի քաղաքական դիվիդենդներ շահեն։ Բայց դրաման ավարտվեց ֆարսով, և այդ մարդն արդեն անձնական ողբերգություն է ապրում։
Կարդացեք նաև
– Ասացիք՝ ով էր բեմադրի՞չը։
– Չգիտեմ, գուցե և ԲՀԿ-ն չի արել։
– Այդ դեպքում որտե՞ղ փնտրենք ու գտնենք այն մարդուն, ով պլանավորեց «Բարգավաճ Հայաստան» կուսակցության 2-րդ համարի հանձնումը։
– Ես Վարդան Օսկանյանին ԲՀԿ չեմ համարում, ինքն էլ չի համարում։ Ինձ թվում է, բեմադրիչները մի քանիսն են։ Բացառված չէ, որ դրսից լինեն, քանի որ «Սիվիլիթասի» բաները գնում են Ամերիկա։ Ի՞նչ իմանաս. ԲՀԿ-ի՞ց են, թե՞ ЦРУ-ից։
– Իշխանական թեւի մի քանի պատգամավորներ չթաքցրին, որ հավատում են Օսկանյան անձի անմեղությանը, բայց միաժամանակ պնդեցին՝ ինչ–որ բան այն չէ։
– 25 տարի է՝ բարեգործական մի կազմակերպության նախագահն եմ կամ տեղակալը։ Էդ խի՞ մեկը չբերեց մի 10 հազար դոլար ու ինձ տվեց։ Ես եթե 2 մլն դրամ տանեմ բանկ, դեպոզիտ դնեմ, իմ ընկերները նույն օրը, Զորի Բալայանի գլխավորությամբ, ինձ կախաղան կհանեն։
– Դուք շատ ճիշտ եք վարվում, պարոն Հարությունյան, կուզեի, որ նույն ճշգրտությամբ էլ մի վերջին անգամ հստակեցնեիք ԲՀԿ–ի մասնակցությունը բեմադրության գործում։
– Էդ ինչո՞ւ եք էդքան «Բարգավաճի» անունը տալիս։ Էդ մարդիկ կարող է լրիվ անմեղ են։ Ի՞նչ կապ ունի ԲՀԿ-ն։ Բանկային մախինացիաներ են՝ Հանթսման-Վարդան Օսկանյան։ Ուզո՞ւմ եք ճիշտը իմանալ. «Բարգավաճը» պիտի հայտարարեր, որ ինքն ընդհանրապես առնչություն չունի։ Հիմա, եթե ես մաոդ սպանեմ, հանրապետականը կոկորդը պատռելով ինձ արդարացնելո՞ւ է, կամ ո՞րն է նրա մասնակցությունն իմ գործած հանցանքում։ Ցավն այն է, որ մենք չենք խորանում երևույթի մեջ։ Օսկանյանն ի՞նչ ԲՀԿ։ Երկու օր առաջ գնացել, տոմս է ստացել, եղավ որ նա ԲՀԿ-ակա՞ն է։ Ես որ տոմս չունենամ, իմ խոսելուց դուք չե՞ք ասի՝ էս մարդը կա՛մ հանրապետական է, կա՛մ դաշնակ։
Վահե ՄԵԼԻՔՅԱՆ
«Իրատես de facto»
