Հոկտեմբերի 18-ին Հայ Ազգային Կոնգրեսում տեղի է ունեցել հանդիպում Ժողովրդավարության և համերաշխության եվրոպական ֆորումի պատվիրակության հետ` Ժան Մարինուս Վիերսմայի և Կրիստիան Վիգենինի համանախագահությամբ: Պատվիրակության կազմում ընդգրկված են Եվրոպայի սոցիալիստական կուսակցության և Եվրոպառլամենտում «Սոցիալիստների և դեմոկրատների առաջադիմական ալյանս» խմբի պատգամավորներ, ինչպես նաև սոցիալիստական ուղղության տարբեր եվրոպական հիմնադրամների ներկայացուցիչներ:
Պատվիրակության խնդրանքով Լևոն Զուրաբյանը ներկայացրել է Հայաստանի ներքաղաքական իրավիճակը, ժողովրդավարության և մարդու իրավունքների ոլորտում առկա հրատապ խնդիրները, անցած խորհրդարանական ընտրությունների գնահատականը և դրանից հետո ձևավորված քաղաքական իրավիճակի պատկերը, տնտեսական ոլորտում համատարած կոռուպցիայի, մենաշնորհների արատավոր համակարգը: Անդրադարձ է եղել նաև տարածաշրջանային խնդիրների, մասնավորապես` հայ-թուրքական հարաբերությունների և ղարաբաղյան հակամարտության կարգավորման հեռանկարներին:
Հանդիպմանը մասնակցել են Հայ Ազգային Կոնգրեսի կենտրոնական գրասենյակի ներկայացուցիչներ Լյուդմիլա Սարգսյանը և Ավետիս Ավագյանը:
