ՀԱԿ անդամ Հայաստանի կանաչների կուսակցությունն այսօր Երեւանի թիվ մեկ ընտրատարածքում լրացուցիչ պատգամավորական ընտրություններում առաջադրել է կուսակցության նախագահ Արմենակ Դովլաթյանին:
ՀԱԿ-ում Դովլաթյանին սատարելու հարց չի քննարկվել: Եկող շաբաթ կայանալիք քաղխորհրդի նիստում, հավանաբար, կքննարկվի: «Ինձ թվում է, որ բնական պետք է լինի, որ ՀԱԿ-ը սատարի իր անդամ կուսակցության ներկայացուցչին»,- ասաց Դովլաթյանը:
Հիշեցնենք, որ այդ ընտրատարածքում լրացուցիչ ընտրությունների անհրաժեշտություն առաջացավ՝ «Հարսնաքար» ռեստորանային համալիրի հայտնի ողբերգությունից հետո, երբ ՀՀԿ-ական պատգամավոր Ռուբեն Հայրապետյանը հրաժարվեց մանդատից:
Կարդացեք նաև
Այդ ընտրատարածքում առաջադրվել են նաեւ «Ժառանգություն» կուսակցության գլխավոր քարտուղար Ստեփան Սաֆարյանը եւ Երեւանի քաղաքապետ Տարոն Մարգարյանի աներորդին՝ Ռոբերտ Սարգսյանը:
Արմենակ Դավլաթյանից հետաքրքրվեցինք՝ իր գնահատմամբ հաղթելու հնարավորություններ ինքն ունի՞: «Եթե հնարավորություններ չլինեին, չէինք առաջադրվի: Մի շարք հաշվարկներ կան»,- ասաց Ա. Դովլաթյանը:
Aravot.am-ի հարցին՝ կարծում եք իշխանությունը հեշտությամբ կզիջի՞, Դովլաթյանը հակադարձեց. « Իսկ իշխանությունը ե՞րբ է հեշտությամբ զիջել»:
Նելլի ԳՐԻԳՈՐՅԱՆ
