«ԲՀԿ-ն դեռ կայացած կուսակցություն չէ, եւ ես չէի ուզենա այնտեղ պառակտումներ լինեն: ԲՀԿ-ն քննադատում է 2008-ից հետո բոլոր կառավարությունները, բայց Վերահսկիչ պալատի հաշվետվությունների մեջ ամենակոռումպացվածը եւ ձախողումները եղել են իրենց նախարարություններում՝ քաղաքաշինության, առողջապահությաւն, սոցիալական: Երեքն էլ եղել են «Բարգավաճի» մարդիկ»,- Aravot.am-ի հետ զրույցում անդրադառնալով ԲՀԿ խմբակցության քարտուղար Նաիրա Զոհրաբյանի այն հայտարարությանը, որ եթե իրենք մասնակցեին բյուջեի կատարողականի քվեարկությանը, անպայման դեմ կլինեին` այսպիսի տեսակետ հայտնեց ՀՀԿ խմբակցության պատգամավոր Խոսրով Հարությունյանը:
Նա դիմեց ԲՀԿ-ին. «Այդպես չի կարելի, չէ՞, սիրելիներս, ամեն ինչը չափ ու սահման ունի: Օսկանյանը քննադատում էր, լավ, հասկացանք, Օսկանյանը չի եղել, բայց դուք էլ սկսեցիք միանալ նրա քննադատություններին: Ո՞ւմ եք հիմարի տեղ դնում: Ինչպե՞ս կարելի է խոսել ձախողված, գահավիժող տնտեսական քաղաքականության, պատասխանատվության մասին, երբ որ առանցքային դիրքերը եղել են քոնը: Ինձ համար դա բացատրելի չէ: Ընդհանրապես ԲՀԿ-ն շտապեց քաղաքական հայտարարություն անել՝ հայտարարելով, որ Օսկանյանի հանդեպ սկսվածը դա նաեւ կուսակցության քաղաքական հետապնդում էր: Դա անթույլատրելի բանաձեւ էր: Պատկերացնո՞ւմ եք 500 հազար ընտրազանգված ունեցող կուսակցությանը հետապնդել: Դա խոսում է այն մասին, որ դուք նույնիսկ կապ էլ չունեք ձեր ընտրազանգվածի հետ: Դա թուլության նշան է: Պարզվեց, որ այդ այլընտրանքի դիրքորոշումը, քաղաքական դիրքը էլ դուք չեք գիտակցել մինչեւ վերջ: Իրենք շատ անփույթ վերաբերվեցին քաղաքական կապիտալի նկատմամբ, որ իրենք ունեին, կուտակել էին: Ընդ որում, վաստակած կապիտալի: Ոչինչ, եթե կուսակցությունն իր մեջ ներուժ գտնի, այդ դժվարությունների արդյունքում կարելի է կազդուրված եւ ավելի առողջացած դուրս գալ: Դրա համար պետք է քաղաքական պատասխանատվություն ունենալ»:
Անդրադառնալով առաջիկա նախագահական ընտրություններին, մենք հետաքրքրվեցինք, թե որքան է, ըստ նրա, ՀԱԿ-ի ներուժը՝ հաղթելու: Ըստ Խոսրով Հարությունյանի, շանսեր ընդհանրապես չկան, եւ ինքը օրիգինալ չէ այդ կարծիքով: Մեր հարցին՝ ինչո՞ւ, Լեւոն Տեր-Պետրոսյանը բավականաչափ խարիզմա չունի՞, ինչպես մեկնաբանել էին «Ժառանգությունից»՝ նա պատասխանեց. «ՀՀ նախագահի պաշտոնում առաջադրվելու համար, իհարկե, խարիզման շատ կարեւոր է, բայց միակը չէ: Միայն դրա համար ՀՀ նախագահ չեն ընտրում: Քաղաքական կենսագրություն հասկացողություն գոյություն ունի: Մեր երկրում ոչ ոք ամնեզիայով չի տառապում: Բոլորն էլ ամեն ինչ շատ լավ գիտեն: Բոլորը գիտեն՝ ով ինչ է արել եւ ինչ կարող էր արժենալ: Ժողովրդին չեն կարող խաբել: Ուրիշ բան, որ մեկի ֆոնի վրա մի քիչ տարբերվեն, ընդամենը: Ընդ որում՝ կարճաժամկետ հատվածում, բայց ոչ երկարաժամկետ: Որեւէ քաղաքական դիրքորոշում նախեւառաջ պետք է բարոյապես արդարացված լինի: Եթե դա այդպես չի, մնայուն, երկարաժամկետ հաջողություններ հնարավոր չէ»:
Կարդացեք նաև
Հռիփսիմե ՋԵԲԵՋՅԱՆ
