Նախկինում տեղեկացրել ենք Տավուշի մարզային գրադարանի նորոգման հետ կապված խնդրի մասին: Հոկտեմբերի 17-ին Իջեւան քաղաքում, Տավուշի մարզային գրադարանի շենքում հանդիպեցինք քաղաքաշինության նախարարության աշխատակիցների, ովքեր ծանոթանում էին այստեղ կատարված նորոգման աշխատանքներին: Մարզային գրադարանի տարածքում շրջելով` տեսանք, որ նորոգումը կատարվել է մեծ խախտումներով: Առաջին հարկի 2 սենյակներում, ուր տեղավորված են այցելուների սպասարկման, գրքերի մշակման եւ համալրման, մեթոդական եւ տեղեկատվական բաժինները, էլեկտրական հոսանքի վարդակներ չկան, այդ սենյակներում էլեկտրական հոսանքի լարեր չեն անցկացվել: Սպասարկման բաժնում տեղադրված է կույրերին ընթերցանել սովորեցելու համար նախատեսված համակարգիչ:
Կարդացեք նաև
«Առանց էլեկտրական հոսանքի համակարգիչն ինչպե՞ս աշխատեցնենք», -«Առավոտի» թղթակցին դժգոհեցին գրադարանի աշխատակցուհիները: Այցելուների սպասարկման բաժնում տեղադրված «եվրապատուհանները» բացելուց հետո չեն փակվում, ուստի գրադարանավարուհիները դրանք ընդհանրապես չեն բացում: Այդ սենյակի մանրահատակը փոխված է , գրադարանավարներն ասացին` ավելի լավ է այն չփոխեին, հինն ավելի լավ էր: Նորոգված սենյակների պատերին բազմաթիվ ճեղքեր կան, նաեւ` խոնավության հետքեր: Նախասրահում գտնվող զուգարանների նորոգումն անավարտ է մնացել: Տավուշի մարզային գրադարանի շենքի նորոգումը սկսվել է 2011 թվականի հուլիսին, այդ նպատակով պետական բյուջեից ծախսվել է 54 միլիոն դրամ: Ծրագիրն ավարտվել է, սակայն այժմ մարզային գրադարանի միայն առաջին հարկն է գործարկվում: Նորոգման աշխատանքների կիսատ մնալու պատճառով մարզային գրադարանի գեղարվեստական գրականության մի մասը գտնվում է Իջեւանի թիվ 5 դպրոցում: Շենքի երկրորդ հարկն ամրացման նպատակով ցանցապատվել է, սակայն գործը կանգ է առել: Այս տարվա հուլիսի 15-ին Իջեւան կատարած այցի ժամանակ փոխվարչապետ, տարածքային կառավարման նախարար Արմեն Գեւորգյանը ծանոթացել է գրադարանի շենքի վիճակին եւ ասել, որ շենքի նորոգումն ավարտելու համար ՀՀ սոցիալական ներդրումների հիմնադրամից լրացուցիչ 30 միլիոն դրամ պետք է հատկացվի: Իջեւանի բնակիչները մեզ հետ զրույցում տարակուսանք էին հայտնել, որ գրադարանի նորոգման համար հատկացված 54 միլիոն դրամը նպատակային է ծախսվել: Այդ հարցի պատասխանը կարող են պարզել մարզային գրադարան այցելած քաղաքաշինության նախարարության աշխատակիցները:
Ոսկան ՍԱՐԳՍՅԱՆ
