Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Մխիթար Պապոյանի նախագահությամբ այսօր շարունակվեց Վարդգես Գասպարիի դեմ հարուցված քրեական գործով դատական վիճաբանությունների փուլը:
Պաշտպանական ճառերով հանդես եկան Վարդգես Գասպարին, նրա պաշտպանները՝ փաստաբաններ Ռոբերտ Ռեւազյանն ու Մուշեղ Շուշանյանը:
Նրանք անդրադարձան անցյալ տարվա հոկտեմբերի 20-ին ՀՀ կառավարությա շենքի դիմաց «Բանակն իրականում» կազմակերպության խաղաղ հանրահավաքին, որի ժամանակ Վարդգես Գասպարիի նկատմամբ հարուցվել է քրեական գործ՝ «խուլիգանության» համար:
Կարդացեք նաև
Պաշտպանական կողմը պնդում էր, թե այդ օրվա տեսանյութից պարզ է դարձել, որ Գասպարին որեւէ հանցանք չի կատարել: Գասպարիին մեղադրանք էր հարուցվել, թե նա սեռական բնույթի հայհոյանքներ է տվել, խանգարել «ներկաների հանգիստը»:: Պաշտպան Ռոբերտ Ռեւազյան ասաց, որ իր պաշտպանյալի բառապաշարում ընդհանրապես սեռական բնույթի հայհոյանքներ չկան, եւ եթե մեղադրանքի կողմի նշած բառերը հայհոյանք են դիտվում, ապա դրանով լի է մեր հեռուստաեթերը, պաշտոնատար անձանց արտահայտությունները: Խոսքը «խուլիգան», «հանցագործ», «սրիկա» եւ այլ բառերի մասին էր:
Մեղադրող Արմեն Աֆանդյանը ռեպլիկի կարգով նկատեց, որ չարժե երկար խոսել «հայհոյանքի» մասին, եւ ակնարկեց, որ կարելի է դրա պատասխանը ստանալ բացելով բացատրական բառարանը:
Վարդգես Գասպարիի ճառը տեւեց երկու ժամից ավելի: Նա անդրադարձավ իրեն ոստիկանության Կենտրոնականի բաժին «հրավիրելու», բերման ենթարկելու, իր կողմից «հասարակական կարգը» խախտելու մասին:
Նա պնդեց, որ ասել է.«Թքած ունեմ ձեր հրավերի վրա» արտահայտությունը: Նրա դիտարկմամբ 2 տարի առաջ ոստիկանության բաժին «հրավիրված» եւ խոհանոցի դանակով սպանված Վահան Խալաֆյանին էլ էին «հրավիրել», Լեւոն Գուլյանին էլ, մյուսներին էլ, եւ ինքը «թքած ունի» հենց այս «հրավերների» վրա:
Վ.Գասպարին ասաց, որ հանրահավաքի օրը ինքը «սրիկա», «խուլիգան» արտահայտություններն արել է այն ժամանակ, երբ նախկին ոստիկանապետը՝ Ալիկ Սարգսյանը դուրս գալով կառավարության շենքից, հրմշտել է հանրահավաքի մասնակիցներին, պատռել Լալա Ասլիկյանի ցուցապաստառը, որպեսզի մոտենա իր մեքենային:
Գասպարին մեղադրող կողմի ապացույցները համարեց հանցավոր ճանապարհով ձեռք բերված, հարցնելով, թե ինչու է մեղադրող կողմն «իր վկաների»՝ 3 ոստիկանների հակասական ցուցմունքները համարում ապացուցված, իսկ հանրահավաքի մասնակիցների ցուցմունքներն անտեսում:
Ավելին, Վ.Գասպարին հայտնեց, որ հանրահավաքի մասնակից ակտիվիստներին ոստիկանները հարցաքննել են «դեպքից» մեկ-երկու ամիս հետո /Լենա Նազարյան, Լալա Ասլիկյան/, իսկ հանցագործության մասին ակտիվիստների եւ ԱԺ պատգամավորների հաղորդումն էլ ոստիկանությունումում ընթացք չի տվել:
Գասպարիին մեղադրել էին, թե նա «սեփական անձի առավելությունները» ցույց տալու նպատակ է հետապնդել: Նա պարսավելի չհամարեց իր՝ մարդկային առավելությունները ցույց տալը, որն արտահայտվել է ճշմարիտ ցուցմունքով: Մինչդեռ, ըստ նրա, ոստիկան վկաները առավելություն չունեին, քանի որ բազմաթիվ անգամ փոխել են իրենց տված ցուցմունքները:
Վ.Գասպարին դարձյալ հիշեց ոստիկանապետին ուղղված դիմումը, որին կցվել էր հանրահավաքը տեսանկարած ոստիկանության օպերատորի լուսանկարը: Նա անգործություն եւ հանցավոր անտարբերություն համարեց մինչ օրս այդ օպերատորին չգտնելու փաստը:
Պաշտպանական կողմը միջնորդեց, որպեսզի Գասպարիի նկատմամբ կայացվի արդարացման դատավճիռ:
Դատական հաջորդ նիստը նշանակվեց հոկտեմբերի 26-ին:
Ռուզան ՄԻՆԱՍՅԱՆ
