Հատված Հայկական սոցիոլոգիական ասոցիացիայի նախագահ ԳԵՎՈՐԳ ՊՈՂՈՍՅԱՆԻ հետ հարցազրույցից
–Ինչի՞ մասն է վկայում ԲՀԿ–ի եւ Վարդան Օսկանյանի հետ կապված պատմությունը։
-ԲՀԿ-ն դարձել է քաղաքական դաշտ ինովացիոն տարրեր ներմուծող ուժ եւ նոր լուծումներ է առաջարկում, անսպասելի քայլեր է կատարում: ԲՀԿ-ի «կաթսան» դեռ եփում է, դեռ հստակ որոշումներ չեն կայացրել, տարակարծություններ կան: Վարդան Օսկանյանի հետ տեղի ունեցած պատմությունն էլ, դարեր առաջ տեղի ունեցած Վարդանանց պատմությունն էլ պետք չէ ստատիկ ընկալել: Դրանք կոդեր են, որոնք միշտ կրկնվում են: Օսկանյանի հետ կապված «նոր վարդանանքը» նման կոդ է:
Վարչակազմում կար մեկը, որ ազնիվ մարդու համարում ուներ, բայց որին պաշտոնաթողությունից հետո մեղադրում են փողեր լվանալու մեջ: Հիմա հասարակությունը հետեւում է այս պատմությանն ու մտածում, որ եթե արտգործնախարարը դա է արել, բա մյուսները ինչե՞ր արած կլինեն: Այսինքն՝ իշխանական կառույցը ժողովրդին հիշեցնում է Սոդոմ-Գոմորի պատմությունը: Պատմական այդ կոդը կրկնվում է:
Նույն կոդն էր 1992-ին, երբ Վազգեն Սարգսյանը պարտությունների շարքը, անկումը ընդհատելու համար ասաց, որ իրեն Արցախում 500 մահապարտ է պետք: Հարյուրավորները մահապարտ դարձան, եւ ամեն ինչ շուռ եկավ: Հիմա նույնպիսի կրիտիկական վիճակում ենք:
Մեր նախագահը հիմա ժողովրդից 50 ազնիվ ու նվիրյալ մարդ պետք է պահանջի եւ նրանց միջոցով փոխի երկրի զարգացման ընթացքն ու դիմագիծը: Դա անելու ներուժ ոչ մի կուսակցություն միայնակ չունի՝ ո՛չ Հանրապետականը, ո՛չ էլ ԲՀԿ-ն:
Մենք պետք է վերանանք կուսակցական մանր խաղերից ու պետություն կառավարելու հիմնախնդիրը լուծենք: Եվ ոչ մի նշանակություն չունի, թե այդ ազնիվ ու նվիրյալ անձինք որ կուսակցությունից կլինեն:
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
