Այսօր Aravot.am -ը ՀՅԴ Շիրակի մարզային կառույցի պատասխանատու Գևորգ Ալեքյանից հետաքրքրվեց, թե ինչո՞ւ են մտափոխվել, ինչո՞ւ այլևս չեն ուզում պատգամավորի թեկնածու առաջադրել թիվ 35 ընտրատարածքում, համապատասխան կադրեր չունե՞ն, թե՞ ինչ-որ բան կաշկանդում է:
Հիշեցնենք, որ ԲՀԿ-ական Սամվել Բալասանյանի` քաղաքապետ ընտրվելուց հետո Գյումրու գարեջրի գործարանի տարածքն ու Ախուրյանի գյուղերն ընդգրկող թիվ 35 ընտրատարածքը մնաց առանց պատգամավորի, և ՀՅԴ-ն առաջին իսկ օրվանից հայտարարում էր, որ իրենք սեփական թեկնածու են առաջադրելու: «Մենք մտածում էինք, որ նորմալ ընտրապայքար կլինի, սակայն թե Երևանում և թե Գյումրիում կազմակերպած քննարկումների ու նիստերի արդյունքում եկանք այն համոզման, որ մեր երկրում մեծամասնական ընտրակարգով առաջադրված պատգամավորից մինչև քաղաքապետ բոլորը նշանակովի են , անընդհատ ոտնահարում են «Ընտրական օրենսգիրքը»: Իսկ մեր պատգամավորները դեռևս Ազգային ժողովի ընտրություններից առաջ բազմիցս առաջարկել են փոփոխություններ կատարել «Ընտրական օրենսգրքում»` վերացնել մեծամասնական ընտրակարգը: Մենք շատ կադրեր ունենք, որոնք իրոք արժանի են պատգամավոր դառնալու, սակայն այստեղ կա նշանակված պատգամավոր, բոլորս գիտենք խոսքը ում մասին է` Արման Սահակյանի: Հանուն նրա նույնիսկ քաղաքապետի տեղ ազատեցին, Բալասանյանին քաղաքապետ կարգեցին, որպեսզի Արմանի պարտքը վերադարձնեին. գիտեք, որ նրան պարտք են թիվ 34 ընտրատարածքի ընտրություններից: Այս ամենից ելնելով` նպատակահարմար չենք գտնում ընտրություններին թեկնածու առաջադրել, նշանակված պատգամավորի հետ իմաստ չկա առաջադրվել, բայց ասեմ, որ ձեռքերս ծալած չենք նստելու, հանձնաժողովներում ընդգրկված մեր անդամները կռիվ են տալու, որպեսզի որևէ կեղծիք ու ընտրախախտում չլինի»,- ասաց Գևորգ Ալեքյանը:
ՀՅԴ կառույցի պատասխանատուն նաև նեղսրտեց, որ դիտավորյալ հեռուսասերիալներ են ցույց տալիս` մարդկանց բթացնելու համար, որպեսզի ընտրողը լռի ու զերծ մնա իրեն առնչվող խնդիրներից: «Կա՞ մարդ Գյումրիում, որ հեռուստասերիալ չնայի, թիվ 35 ընտրատարածքի ցանկացած բնակչի ավելի շատ կհետաքրքրի, թե Լորդի կինը ո՞ւմ հետ նրան դավաճանեց , ի՞նչ կերավ, քան կհետևի ժամը 22.00 լրատվական թողարկումներին: Նրանց բացարձակ հետաքրքիր չէ, որ իրենց քթի տակ ընտրություններ են, և իրեն ց իսկ քվեով ընտրվելու է որևէ մեկը, ով իրենց իսկ խնդիրները կբարձացնի Ազգային ժողովում»,- ասում է մեր զրուցակիցը:Նշենք, որ մինչ այս պահը թիվ 35 ընտրատարածքում առաջադրված մեն ու միակ թեկնածուն «Շիրակ» ֆուտբոլային ակումբի սեփականատեր, հանրապետության խոշոր հարկատու Արման Սահակյանն է, ով մայիսի 6-ին տեղի ունեցած ԱԺ ընտրություններում պարտվեց ԲՀԿ-ական Մարտուն Գրիգորյանին:Կան խոսակցություններ, որ նրա դեմ կպայքարի ՀԱԿ-ը:Նշենք, որ վաղը փաստաթղթերի հանձման վերջին օրն է, և պատգամավորացուների վերջնական անունը հայտնի կդառնա երեկոյան ժամը 18-ից:
Նունե ԱՐԵՎՇԱՏՅԱՆ
