Այսօր Aravot.am-ը ՀՀԿ խմբակցության պատգամավոր Խոսրով Հարությունյանին փոխանցեց Հմայակ Հովհաննիսյանի քաղաքագիտական վերլուծությունը, ըստ որի, ԲՀԿ պատգամավոր Վարդան Օսկանյանը իշխանության հետապնդումներից շահեց, լուսանցքից եկավ, առանցքային դեմք դարձավ ԲՀԿ-ում: Նա պատասխանեց. «Բայց ի՞նչ գնով: Կարեւորը գինն է: Ինքը այդ հնարավորությունները ձեռք բերեց նույնիսկ իր կուսակիցներին հարվածի տակ դնելու գնով: Կապրենք՝ կտեսնենք: Ինքը հիմա կոնֆլիկտ ունի իր կուսակցության ներսում: Ես չեմ ուզում որեւէ ավելի բան ասել՝ կտեսնենք»:
Մենք փորձեցինք ճշտել՝ այդ կոնֆլիկտի հետ կապ ունի՞ ԲՀԿ առաջնորդ Գագիկ Ծառուկյանի՝ դատախազի միջնորդության քննարկման օրերին ԱԺ նիստերին չմասնակցելը: Խոսրով Հարությունյանը միայն ժպտաց. «Ժամանակը ցույց կտա: Ամեն մի քաղաքական նպատակ չէ, որ ցանկացած գնով կարող է արդարացված լինել: Քաղաքական դիրքորոշումը նախեւառաջ պետք է բարոյապես արդարացված լինի: Այստեղ ինքը խոցելի է: Եթե դա բարոյապես արդարացված չի, վաղ թե ուշ իրեն զգացնել է տալու: Հիշեք խոսքերս: Բոլորը կարծում են՝ քաղաքականությունը ինտրիգների ոլորտ է, քաղաքականությունը նույնիսկ անբարոյականություն է: Հավատացնում եմ, որ քաղաքականությունը հանրային կյանքի այն ոլորտն է, որտեղ բացառապես պետք է գործել ճերմակ ձեռնոցներով: Ովքեր դա չեն անում, միշտ քաղաքականությունը նրանց այնպես է հարվածում, որ նրանք երկար ժամանակ ուշքի չեն գալիս: Քաղաքականությունը ամենաբարոյական ոլորտն է, ովքեր դա չեն գիտակցում, քաղաքականությամբ պետք է չզբաղվեն»:
Հայտնի է, որ ԲՀԿ-ն պայքարում է վարչապետի պորտֆելը վերցնելու համար: Մենք հետաքրքրվեցինք՝ եթե նախագահական ընտրություններից առաջ կամ հետո ինչ-ինչ պայմանավորվածություններ ձեռք բերվեն վարչապետի պաշտոնը ԲՀԿ-ին տալու հետ կապված, հնարավո՞ր է դրա դիմաց Գագիկ Ծառուկյանը եւ ԲՀԿ-ն Վարդան Օսկանյանին թողնեն մենակ: Խոսրով Հարությունյանը պատասխանեց. «Որքան ես եմ հասկանում՝ մարտավարական այս գործընթացը հանգեցնելու է մի տրամաբանական արդյունքի՝ Վարդան Օսկանյանը դուրս է գալու Բարգավաճից: Նրանք սկզբունքորեն անհամատեղելի են»: Մենք ճշտեցինք՝ Ռոբերտ Քոչարյանի ստեղծած քաղաքական ուժն է եւ նրա մարդիկ, ինչո՞ւ են անհամատեղելի՝ պարոն Հարությունյանը պատասխանեց. «Ինչու Քոչարյանի թիմում անհամատեղելիներ չկա՞ն: Իհարկե, կան»:
Ըստ Խոսրով Հարությունյանի, «Ես ինքս Օսկանյանին հավատում եմ: Ես ինքս մի վայրկյան թույլ չեմ տա ինձ ենթադրել, որ Օսկանյանը փորձել է ինչ-որ մեկին գրպանահատել: Ես այստեղ կասկածներ չունեմ: Ինձ համար անբացատրելի է Օսկանյանի վարքագիծը: Երբ ինչ-ինչ կասկածներ կան, ամենաբանական վարքագիծը, առավել եւս, եթե դու հեղինակություն, անուն ունեցող մարդ ես, այն է, որ պետք է հիմնավորել, որ ձեր կասկածներն անհիմն են: Ես կանեի այդպես: Բայց երբ հրաժարվում են որեւէ քննությունից, որեւէ բան ասելուց, հայտարարում են, որ իր նկատմամբ սկսվում են քաղաքական հետապնդումներ եւ հրավիրում տասը դեսպանների՝ ժամերով նրանց են բացատրությունններ տալիս: Ինձ համար դա անթույլատրելի է: Տրամաբանություն չկա այստեղ»:
Կարդացեք նաև
Հիշեցնենք, որ այսօր Վարդան Օսկանյանի փաստաբան Տիգրան Աթանեսյանը վստահեցրեց, որ պարոն Օսկանյանը նախաքննության մարմինների հարցերին սկզբում պատասխանել է, տվել է սպառիչ պատասխաններ: Բայց Խոսրով Հարությունյանի խոսքերով՝ նա հարցերի պատասխան տվել է, երբ դատախազը մտնելիս է եղել ԱԺ. «Մենք մոտ 3 ժամ ԱԺ-ում լսում էինք այն, ինչ պետք է Օսկանյանն ասեր մինչ այդ՝ քննիչների մոտ: Եթե պարզվում է, որ քննիչներն իրոք ունեն պատվեր, հաջորդ քայլը ես այսպես կանեի՝ կկապվեի հանրապետության նախագահի հետ, կհրավիրեի լսումներ եւ մի հարց կդնեի՝ խնդրում եմ հանկարծ իմ նկատմամբ օրենքը ոչ օբյեկտիվ չկիրառել: Եթե դրանից հետո էլ այդպես կանեին, խնդրեմ, նոր հայտարարեիք քաղաքական հետապնդման մասին, ոչ թե 10, այլ հարյուր դեսպան հրավիրեիք: Բայց կներեք, մենք հո երեխա չե՞նք: Ելույթի մեջ ասում է՝ մեզ մոտ եկել է 1937 թիվը: Ո՞վ չի հասկանում, որ այդ թիվը թարգմանվում է անգլերեն, գնում է այնտեղ, որտեղ 37 թիվը այլ պատկերացում է: Ինչի՞ մասին է խոսքը: Կներեք, մեզ մոտ այսօր իրականությունը, իր բոլոր թերություններով, որեւէ աղերս ունի՞ 37 թվի հետ: Դուք կարծում եք դա պատահակա՞ն է արվում՝ ես այդ կարծիքին չեմ: Ինձ համար ինչն է անընդունելի, որ Հայաստանի արտաքին գերատեսչությունը 10 տարի ղեկավարած մարդը, որը գիտի ինչ է նշանակում միջազգային հարաբերություններում քաղաքական վարկը, գիտի որքան դժվար է այն ձեռք բերվում եւ որքան հեշտ կարելի է դա կորցնել: Այդ անձնավորությունը սեփական քաղաքական հեղինակությունը, այն էլ՝ ոչ արժեքավոր, ձեւավորելու համար պատրաստ է այդ քայլին: Կներեք, սա ինձ համար անընդունելի է»:
Մեր դիտարկմանը, որ իշխանությունները 10 տարվա արտգործնախարարին այդպիսի մեղադրանք առաջադրելուց առաջ պետք է հաշվարկած լինեին այդ ամենը, որ վնաս կհասցվի նաեւ Հայաստանի հեղինակությանը, նա պատասխանեց. «Օսկանյանի՝ 10 տարվա, իմ կարծիքով՝ անբասիր աշխատանքը պակա՞ս վարկ էր նրան բերում՝ իր քաղաքական ապագան ապահովելու: Այդ ամենի արդյունքում, հիշեք, ինքը, ցավոք, դուրս է գալու կորցրած: Կապրենք՝ կտեսնենք: Ես նկատի ունեմ քաղաքական լուրջ հաջողություններ արձանագրելու համատեքստում: Նախագահական ընտրությունները կլինեն, հետագան կլինի՝ կապրենք կտեսնենք: Ես շատ կուզենամ, որ ես սխալված լինեմ»:
Մենք ճշտեցինք՝ Դուք ամեն դեպքում ընդունում եք, որ Վարդան Օսկանյանի այս պատմությամբ մեր երկրի վարկը վնասվեց՝ ՀՀԿ խմբակցության պատգամավորը պատասխանեց. «Իհարկե: Բայց ես մի րոպե անգամ չեմ կասկածում, որ հանիրավի ոչ մեկին չեն կարող պատժել: Եթե պարզվեց, որ Օսկանյանը ճիշտ է, ուրեմն ուրիշներն են պատժվելու»:
Հռիփսիմե ՋԵԲԵՋՅԱՆ
