«Հայացք» ակումբի այսօրվա հյուրն էր ԳԱԱ երիտասարդ գիտնականների խորհրդի նախագահ, Երիտասարդ գիտնականների աջակցության ծրագրի ղեկավար մարմնի անդամ Գևորգ Վարդանյանը, ով ամփոփեց եռամսյա ծրագրի արդյունքները:
Վարդանյանը հայտնեց, որ ՀՀ նախագահի առաջարկով հուլիսի մեկից մեկնարկած ծրագրին տրամադրվել է ընդհանուր առմամբ հարյուր միլիոն դրամ. «Ծրագիրն ընթացել է չորս ուղղությամբ՝ երիտասարդ գիտնականների արտասահմանյան գործուղումների ֆինանսական աջակցություն, երիտասարդ գիտնականների կազմակերպած գիտաժողովների ֆինանսավորում, մրցանակաբաշխություն եւ անհատական դրամաշնորհների տրամադրում՝ յոթ հազար դոլարի չափով: Հուլիսից ի վեր ընդունել ենք ծրագրի մասնակցության հայտեր. 17 երիտասարդ գիտնական իրավունք ստացավ մասնակցել միջազգային գիտաժողովների, ինչի համար տրամադրվել է շուրջ հինգ միլիոն դրամ: Ուրախությամբ փաստեմ, որ մեր երիտասարդ գիտնականներն այս ընթացքում կայացած գիտաժողովներում արժանացել են 1-ին մրցանակի՝ ներկայացնելով գիտության տարբեր ոլորտներին առնչվող զեկույցներ»: Բանախոսը հավելեց, որ ծրագրի շրջանակում պայմանագրեր են կնքվել «Գիտության եւ առաջատար տեխնոլոգիաների ազգային հիմնադրամի» եւ Գիտության պետական կոմիտեի հետ. «Հիմնադրամը մեզ տրամադրելու է քսան միլիոնի դրամաշնորհ, իսկ Գիտպետկոմի հետ անց է կացվում ասպիրանտների աջակցության ծրագիր: Կոմիտեն օգնում է անվճար գիտական փորձաքննություն անցկացնելու հարցում, ինչը կարեւոր ձեռքբերում է»:
Կարդացեք նաև
Մրցանակաբաշխության շուրջ երիտասարդ գիտնականների խորհրդի նախագահն ասաց, որ անվանակարգերը քննարկման փուլում են. «Ներառվելու են գիտության բոլոր ոլորտները: Սահմանվելու են Հայաստանում եւ արտասահմանում գործող հայ գիտնականների անվան մրցանակներ, որպեսզի հանրությունը ճանաչի նրանց»:
Անդրադառնալով երիտասարդ գիտնականների արտահոսքին՝ Գևորգ Վարդանյանն ասաց, որ գիտնականների միջին աշխատավարձը բավարար չէ. «Երիտասարդ գիտնականներն առաջնահերթ սոցիալական խնդիրներ ունեն, բայց ծրագիրը որոշ չափով կմեղմի արտահոսքը: Հաշվի առնենք, որ ՅՈՒՆԵՍԿՕ-ի տվյալների համաձայն՝ մեր գիտնականները տարածաշրջանի առաջատարներն են եւ փոքր- ինչ զիջում են Իսրայելին, որը գիտությանը ահռելի գումարներ է հատկացնում»:
Լուիզա ՍՈՒՔԻԱՍՅԱՆ
