Արտակ Նազարյանի մահվան գործով դատավարության հոկտեմբերի 16-ի նիստում շարունակվեց Արտակ Նազարյանի հետմահու կրկնակի դատահոգեբանական եւ դատահոգեբուժական փորձաքննություն նշանակելու վերաբերյալ Հակոբ Մանուկյանի պաշտպաններ Հրանտ Գեւորգյանի եւ Արմինե Ղասաբօղլյանի միջնորդության քննարկումը: Մեղադրող Հարություն Հարությունյանը դեմ արտահայտվեց միջնորդությանն` ասելով, որ նախկինում դատահոգեբանական եւ դատահոգեբուժական փորձաքննությունը կատարվել է ոչ միայն վկաների նախաքննական ցուցմունքների , այլեւ` քրեական գործում առկա նյութերի հիման վրա, որ քրեական գործում կան նաեւ զինծառայողների բացատրություններ:
Մեղադրող Հարություն Հարությունյանն ասաց, որ դատահոգեբանական փորձաքննության հեղինակը միայն Էլդա Գրինը չէ, որ փորձաքննությունը կատարել է գիտության դոկտորներից, ակադեմիկոսներից բաղկացած հանձնաժողովը, որի նախագահը Էլդա Գրինը չէ: Տուժողի իրավահաջորդի ներկայացուցիչ, փաստաբան Մուշեղ Շուշանյանը միացավ միջնորդությանը, սակայն` վերապահումով: Շուշանյանը դեմ արտահայտվեց, որ փորձաքննության ենթարկվի Արտակ Նազարյանի ծոցատետրը եւ դրանից պոկված էջը: Շուշանյանն ասաց, որ այդ ծոցատետրի հետ կապված առեղծվածային չբացահայտված հանգամանքներ կան: Վահագն Հայրապետյանի պաշտպան Լեւոն Պողոսյանը հայտարարեց, որ դատահոգեբանական եւ դատահոգեբուժական փորձաքննություն կատարած փորձագետները իրենց ձեռքի տակ չեն ունեցել քրեական գործը, այլ միայն` ելակետային տվյալներ, փորձագետները քրեական գործի վրա նշումներ չեն արել: Պաշտպան Պողոսյանն ասաց, որ փորձաքննության եզրակացության տակ Էլդա Գրինի ստորագրությունը նրանը չէ, նմանեցված է: Պաշտպան Հրանտ Գեւորգյանն ասաց, որ եթե էլդա Գրինի ստորագրությունը նմանեցված է, ապա դա հանցանք է: Գեւորգյանն ասաց, որ փաստորեն դատարան է ուղարկվել չբացահայտված քրեական գործ, որ եթե դատարանը չունենա օբյեկտիվ անցկացված դատահոգեբանական, դատահոգեբուժական փորձաքննության եզրակացություն, ինչպե՞ս կարող է վճիռ կայացնել: Միջնորդության վերաբերյալ որոշում կայացնելու համար դատավոր Սամվել Մարդանյանը հեռացավ խորհրդակցական սենյակ, որտեղից կվերադառնա ժամը 14-ին:
Ոսկան ՍԱՐԳՍՅԱՆ
