Անդրադառնալով գոմեշի մսի սկանդալային պատմությանը՝ պաշտպանության նախարարության մամուլի խոսնակը հայտարարել է, թե «90-ականներին եւ 2000 թվականների սկզբին բանակում եղած սննդի որակի չափանիշները էականորեն բարձրացվել են»։
«ՉԻ»- Բրա՛վո, ինչպիսի փայլուն նվաճում։ Պարզվում է՝ հիմա բանակին ավելի լավ են կերակրում, բան 15 տարի առաջ։ Ո՞ւմ մտքով կանցներ։ Տիգրան Մեծի ժամանակ ընդհանրապես խայտառակ վիճակ էր՝ զինվորները նույնիսկ պատառաքաղ չունեին եւ անգամ ձկան պահածո չէին ուտում։ Սա, ի դեպ, ասում ենք՝ ընդամենը բացատրելու համար, որ որեւէ ոլորտում տիրող վիճակն անցյալի հետ համեմատելն անիմաստ է. դրա փոխարեն պետք է համեմատել առկա հնարավորությունները եւ փաստացի վիճակը։ Այսինքն, պետք է հասկանալ զինված ուժերի ներկա բյուջեով հնարավո՞ր է զինվորներին շատ ավելի լավ կերակրել, թե՞ հնարավոր չէ։ Իսկ եթե այնուամենայնիվ անցյալի հետ համեմատելու ցանկություն կա, ապա կառաջարկեինք այլ համեմատություն անցկացնել. 90-ականների՞ն էին գեներալներն ավելի մեծ գումարներ «աշխատում», թե՞ հիմա։
«Չորրորդ ինքնիշխանություն»
