Այսօր ՀՀ սփյուռքի նախարար Հրանուշ Հակոբյանը ներկայացրեց ՀՀ սփյուռքի նախարարության 2012թ. գործունեությունը: Սփյուռքի նախարարությունը հաշվետու ժամանակաշրջանում իր աշխատանքը նպատակաուղղել է Հայաստանի Հանրապետության կառավարության կողմից` ՀՀ սփյուռքի նախարարության առջեւ դրված գերակա խնդիրների, աշխատանքային ծրագրի կատարմանը:
Նախարարի համոզմամբ՝ Սփյուռքի նախարարությունը պետական կառավարման կայացած մարմին է եւ լուծել է իր առջեւ դրված կազմակերպչական, իրավական եւ գաղափարական խնդիրները. «Նախարարությունը, ի տարբերություն կառավարման այլ համակարգերի, չի կարող Սփյուռքին ինչ-որ բան հրամայել: Մենք դիմում ենք Սփյուռքին, խնդրում, հորդորում, եւ եթե վերջինս չարձագանքի, մեր համատեղ ծրագրերը չեն կայանա: Նախարարության կայացման գլխավոր պայմանը Սփյուռքի շուրջ երեսուն հազար կազմակերպության եւ անհատի հետ համագործակցությունն է: Եթե համեմատենք մեր գործունեության առաջին եւ չորրորդ տարիները, տասնապատկվել են իրականացվող ծրագրերը՝ մասնակիցների թվի եւ ներգրավվածության առումով: Էական է, որ տարեցտարի ներգրավվածությունն ընդգրկում է աշխարհագրական առավել մեծ շրջանակներ»:
Տիկին Հակոբյանն ասաց, որ նախարարության գործունեության չորս տարվա ընթացքում Հայաստանում զբոսաշրջությունն աճել է 35 տոկոսով. «Կարեւոր էր նաեւ երկքաղաքացիության ինստիտուտի ներդրումը: Նախկինում շատ էին բողոքները՝ կապված երկքաղաքացիություն ստանալու փաստաթղթային քաշքշուկների հետ, սակայն այժմ օրենսդրական խնդիրները կարգավորված են, եւ մեր հայրենակիցները սիրով են դառնում երկքաղաքացի: Առաջին տարում երկքաղաքացի դարձան շուրջ 1700-ը, իսկ հետագայում թիվը տասնապատկվեց»:
Նախարարը նաեւ նշեց, որ մի շարք գիտակրթական եւ հոգեւոր հաստատությունների հետ համագործակցության արդյունքում հրատարակվել են կրթական եւ ճանաչողական գրքեր, ձեռնարկներ եւ խտասկավառակներ ու տարածվել Սփյուռքում:
Կարդացեք նաև
Հավելենք, որ նախարարության առաջիկա միջոցառումների մեջ են մտնում Լիբանանում կայանալիք հայկական ձեռագրերի հանրաճանաչության ծրագիրը՝ Զմառի միաբանության հետ համատեղ, եւ սուրբ Ղազար կղզում կայանալիք հայկական տպարանների ցուցահանդեսը:
Լուիզա ՍՈՒՔԻԱՍՅԱՆ
