Ազատազրկման դատապարտված ՀԱԿ ակտիվիստների հարցը Եվրոպայի լիբերալ երիտասարդների ալյանսում նախօրեին հաստատվել է
Հայաստանում երիտասարդների հանդեպ քաղաքական հալածանքները դատապարտող ՀՀՇ երիտասարդական միության ներկայացրած բանաձեւը: Այսօր այս մասին ՀՀՇ գրասենյակում հրավիրված ասուլիսում ասաց ՀՀՇ երիտասարդական միության գործադիր խորհրդի անդամ Եվա Թովմասյանը: Ըստ նրա, Բուլղարիայում տեղի ունեցած հանդիպման ժամանակ համաժողովի եվրոպացի մասնակիցները զարմացել են, երբ ինքը պատմել է, թե ինչպես են Հայաստանում ոստիկանները վերաբերվում ընդդիմության երիտասարդներին. «Եվրոպացու համար աբսուրդ երեւույթ էր, երբ պատմեցի, թե ոստիկանը ասում է՝ ընդդիմություն է, եկեք սրան ռադ անենք: Բոլորը զարմացած էին այս պատմությունից, ու միաձայն քվեարկությամբ մեր բանաձեւն անցավ»:
Ըստ Ե. Թովմասյանի, այսուհետեւ Եվրոպայի լիբերալ երիտասարդական ընկերությունը իր բոլոր ռեսուրսներն օգտագործելու է Հայաստանին վերաբերող բանաձեւը հասցնելու եվրոպական տարբեր կառույցներ: Ինչպես նաեւ, ընկերությունը պարտավորվել է Հայաստանի իշխանությունների հետ ցանկացած շփման դեպքում շեշտադրել ազատազրկման դատապարտված ՀԱԿ ակտիվիստ Տիգրան Առաքելյանի ազատ արձակման հարցը եւ ՀԱԿ մյուս 3 ակտիվիստների նկատմամբ քաղաքական հետապնդումները դադարեցնելու հարցը:
Ե. Թովմասյանն ասաց, որ բանաձեւի ընդունման մասին արդեն տեղեկացրել է Տիգրան Առաքելյանին. «Խնդրել եմ՝ նրան տեսակցության գնալու ժամանակ հայտնեն, որ պարտքս կատարել եմ իր նկատմամբ»:
Կարդացեք նաև
Ասուլիսին ներկա քրեական հետապնդման մեջ գտնվող ՀԱԿ ակտիվիստ Սարգիս Գեւորգյանն էլ ասաց, որ համոզված է՝ այսպիսի բանաձեւերը ու միջազգային հանրության կողմից նման գնահատականները նպաստելու են Հայաստանում քաղբանտարկյալ հասկացության վերացմանը:
Արփինե ՍԻՄՈՆՅԱՆ
