Այսօր Aravot.am-ը ՀՀԿ խմբակցության պատգամավոր Նաիրա Կարապետյանից հետաքրքրվեց, թե ի՞նչ տպավորություն է ստացել «Ժառանգություն» – «Ազատ դեմոկրատներ» խմորումներից, որ Խաչատուր Քոքոբելյանը չի՞ ուզում ոչ մի կերպ մանդատից հրաժարվի, թե՞ Րաֆֆի Հովհաննիսյանն է սխալ հասկացել: Նաիրա Կարապետյանը պատասխանեց. «Ես անհամբեր սպասում եմ, թե Րաֆֆի Հովհաննիսյանի մանդատն ում կհասնի: Պաշտոնական հայտարարություններից հասկացա, որ միգուցե իրենք ինչ-որ բան չեն հասկացել, կնստեն, կխոսեն, կհասկանան: «Ժառանգությունն» էլ, «Ազատ դեմոկրատներն» էլ ԱԺ-ում բավականին ակտիվ են»:
Հիշեցնենք, որ Րաֆֆի Հովհաննիսյանը հայտարարություն էր տարածել, որ Խաչատուր Քոքոբելյանը չի պահել տղամարդու իր խոսքը, իսկ Քոքոբելյանը պատասխան հայտարարություն էր տարածել, որ դաշինք ստեղծել դեռ չի նշանակում մանդատների միանձնյա տնօրինում:
Նաիրա Կարապետյանի մեկնաբանությամբ` «Քաղաքական դաշտում տղամարդ եւ կին բաժանումները չեմ հասկանում կամ տղամարդկային, կամ ոչ տղամարդկային քայլերը: Ամեն մարդ իր խոսքին տեր պիտի կանգնի: Եթե քաղաքական գործիչը նախադասություն է արտասանում, ինքը այդ նախադասությանը պիտի տեր կանգնի` ամեն դեպքում: Իսկ թե ինչ սկզբունքների վրա է ի սկզբանե հիմնվել «Ազատ դեմոկրատների» եւ «Ժառանգության» դաշինքը, գիտեն նրանք: Շատ ցավում եմ, որ այսօր այդ խոսակցությունն այդ քաղաքական ուժի մեջ կա, որովհետեւ իրենց մոտ էլ կային շատ ուժեղ երիտասարդ ներկայացուցիչներ: Եթե իրենց մեջ էլ է այս պահին խմորումներ գնում` ես որպես մարդ, ուղղակի ցավում եմ: Միգուցե աթոռակռվի հետ է կապված դա, միգուցե նախագահական ընտրությունների, միգուցե այդ մի մանդատի, չեմ կարող տալ որեւէ գնահատական: Կարող է լինել շատ անձնական, իմ կուսակցությունը շատ ներկայացված լինի, քո կուսակցությունը քիչ ներկայացված լինի, այսպիսի խոսակցություն ու կարող է լինի ավելի նեղ անձնական` այս մանդատը թող հասնի այս մարդուն, այն մանդատը թող հասնի այն մարդուն: Իսկ դա արդեն թելադրանք է»:
Կարդացեք նաև
Հռիփսիմե ՋԵԲԵՋՅԱՆ
