Այս տարվա հունվարի 30-ին ՀՀ ոստիկանության քննչական գլխավոր վարչության Հատկապես կարեւորագույն գործերով վարչությունը տեղեկացրեց Աշոտ Չիթիրյանին՝ հարուցված քրեական գործով հետապնդում չիրականացնելու եւ քրեական գործով վարույթը կարճելու մասին:
Աշոտ Չիթիրյանը դիմել էր Էրեբունու դատախազին, տարածքային ոստիկանություն, հայտնելով, որ 2010թ. հուլիսին այցելելով հոր՝ Հովհաննես Չիթիրյանի գերեզմանատուն, հայտնաբերել է այլ հանգուցյալի տապանաքար, հուշաքար, այսինքն, հայրական գերեզանատանը այլ հանգուցյալ է հուղարկավորվել:
2 տարի եւ ավելի Աշոտ Չիթիրյանը չի կարողանում հոր գերեզմանից հանել տալ այլ հանգուցյալին:
Կարդացեք նաև
«Առավոտը» 2010թ.հոկտեմբերի 27-ին մասնակցեց անգամ գերեզմանատեղիի զննմանը, բացմանը, եւ մեր լուսանկարչական սարքն արձագրեց, որ Չիթիրյանենց գերեզմանատանը ամփոփված է մեկ այլ հանգուցյալ էլ:
Ոստիկանությունը փաստի առթիվ հարուցեց քրեական գործ, ոստիկանություն կանչվեցին «Արին Բերդ» գերեզմանատան աշխատակիցները, «Բնակչության հատուկ սպասարկում» համայնքային ոչ առեւտրային կազմակերպության տնօրենը:Սակայն որեւէ մեկը «Բնակչության հատուկ սպասարկում» կազմակերպությունից պատասխանատվության չենթարկվեց, չպարզվեց, թե ինչպես է, որ 1991թ.օգոստոսին հուղարկավորվածի կողքին հայտնվում 2009-ից մեկ այլ հանգոցյալ եւ սա որակվեց հանցակազմի բացակայություն:
Աշոտ Չիթիրյանը դիմեց Էրեբունի եւ Նուբարաշեն վարչական շրջանների ընդհանուր իրավասության դատարան,ուր մինչ օրս ընթաում է դատական քննություն:
Աշոտ Չիթիրյանը դատարանից պահանջում էր հանել տալ հոր գերեզմանատանը հանգուցյալին եւ գերեզմանը բերել նախկին տեսքին:
Այսօր տեղեկացանք, որ դատարանը (դատավոր Վ.Ասլանյան) վարույթ է ընդունել հակընդդեմ հայցադիմում: Պատասխանողը՝ այլ հանգուցյալի հարազատները պահանջում են, որպեսզի նշված գերեզմանատեղիի բարեկարգման ծախսերը՝ 1.860.000 ՀՀ դրամի չափով, այդ թվում՝ վերահուղարկավորման եւ դատական ծախսերը բռնագանձվեն Աշոտ Չիթիրյանից եւ «Բնակչության հատուկ սպասարկում» կազմակերպությունից:
Դատարանին հակընդդեմ հայցվորը տեղեկացնում է. «Հակընդդեմ հայցվորը գերեզմանատեղիի նկատմամբ բարեխիղճ տիրապետող է հանդիսանում, ու փաստացի կատարել է ծախսեր»:
Ռուզան ՄԻՆԱՍԱՆ
