Երեկվանից Գյումրու նորընտիր քաղաքապետ Սամվել Բալասանյանը սկսել է քանդուքարափ անել նախորդ քաղաքապետ Վարդան Ղուկասյանի առանձնասենյակը: Նա վերացրել է պատերի գիպսե անկյունակները, բաց կանաչավուն ֆոնը, նաև հանել է գույքը:
Սամվել Բալասանյանի այս քայլը իրոք զարմացրել է գյումրեցիներին, քանի որ Վարդան Ղուկասյանի կաբինետը իդեալական վիճակում էր, մնում էր բանալիով բացել ու վայելել: Գյումրու քաղաքապետարանի շենքը շահագործման հանձնվեց ընդամենը 1 ու կես տարի առաջ, և ցանկացած առանձնասենյակում եվրառեմոնտ է արված, վերանորոգման կարիք ընդհանրապես չկա:
Նշենք, որ Վարդան Ղուկասյանին որքան էլ քննադատեն իր էքսցենտրիկ բնավորության համար, այդուհանդերձ նա աչքի է ընկնում իր եզակի ճաշակով, մաքրասիրությամբ, սիրում է ճոխություններ: Նախկին քաղաքապետը փող չի խնայել իր կաբինետը ամենաշքեղը դարձնելու համար, այնտեղ տեղադրված սեղանն ու աթոռները արժեն մոտ 2800 դոլար, էլ չենք խոսում պահարաններից, որոնք ևս չափազանց թանկարժեք են ու նրբաճաշակ:
Կարդացեք նաև
Գյումրեցիները ենթադրում են, որ ներկայիս քաղաքապետին ոչ թե նեղել է Վարդան Ղուկասյանի ճաշակը, այլև նա «ժուչոկներ» է փնտրում առանձնասենյակում, պատերի արանքում, այլապես նա այս քայլին չէր գնա, քանի որ եղանակային առումով վերանորոգման համար անհարմար ժամանակ է, չհաշված որ պարոն Բալասանյանը մեծ վնաս է հասցնում առանց այն էլ պարտքերի մեջ թաղված տեղական բյուջեին:
Նշենք նաև, որ Վարդան Ղուկասյանը և առհասարակ քաղաքապետարանի նախկին աշխատակիցները իրենց առանձնասենյակների ներքին հարդարումը կատարել էին սեփական գրպանի հաշվին: Այս մասին բազմիցս անդրադարձ է եղել մամուլում:
Ի՞նչն է ստիպում նորանշանակ քաղաքապետին վերանորոգել հին քաղաքապետի շքեղ վերանորոգված կաբինետը, մի ՞թե նա այնտեղ «ժուչոկ» է փնտրում, այս հարցերի շուրջ մենք պարզաբանումներ խնդրեցինք Գյումրու քաղաքապետարանի նորանշանակ մամուլի քարտուղար Զոհրապ Եգանյանից: Նա փոխանցեց, որ քաղաքապետի աշխատասենյակը իրոք վերանորոգվում է, նպատակը մեկն է` նորանշանակ քաղաքապետի ճաշակին համապատասխանեցնելը, այնտեղ նախատեսվում է կատարել որոշակի գունային փոփոխություններ: Ըստ Զոհրապ Եգանյանի, որևէ այլ նպատակ չկա, և այս ամենը կատարվում է պարոն Բալասանյանի անձնական միջոցների հաշվին: Մամլո քարտուղարը չբացառեց, որ գույքի փոփոխություն ևս կարող է տեղի ունենալ:
Հավելենք, որ պարոն Բալասանյանը առայժմ տեղավորվել և օգտվում է նորանշանակ փոխքաղաքապետ Ռուբեն Սանոյանի կաբինետից, որը նախկինում պատկանում էր կոմունիստ փոխքաղաքապետ Գագիկ Մանուկյանին :
Նունե ԱՐԵՎՇԱՏՅԱՆ
