«Pay it forward» («Ես քեզ, դու` ուրիշին» ) ֆիլմը հուզեց ներկաներից շատերին: Երեկ` հոկտեմբերի 13-ին, ՆՓԱԿ-ում 2000 թվականին նկարահանված ամերիկյան ֆիլմի դիտումն էր: Գեղեցիկ ֆիլմ դիտելու նախաձեռնությունը միայն հաճելի ժամանակ անցկացնելու նպատակ չուներ. ավարտից հետո ազդարարվեց` «Ես քեզ, դու` ուրիշին» գաղափարն այլեւս մեր հասարակությունում է:
Բարեգործական նախաձեռնության համահիմնադիրներից Լուսինե Վայաչյանը այժմ Եվրոպայում է` բուժման նպատակով: Նախաձեռնության մտահղացումը ծնվել է, երբ նրա դուստրը ֆեյսբուքահայությանը ուղղած կոչով խնդրել է օգնել եւ ֆինանսական միջոցներ տրամադրել մոր բուժման համար: Նախաձեռնությունն ակնկալվում է ստեղծել համապատասխան կայք, ցանց, եւ դրա միջոցով շրջանառության մեջ դնել տեղեկություններ մարդկային կյանքին սպառնացող ծանր հիվանդություններ ունեցող անձանց մասին, ովքեր ֆինանսական միջոցների ու դոնորների առկայության դեպքում ենթակա են բուժման:
Նախաձեռնության համահիմնադիրներից Արմեն (Արմոս) Մարտիրոսյանը բացատրեց, թե
ինչպես է գործելու նախաձեռնությունը. հիվանդություն ունեցող անձինք կամ նրանց հարազատները կդիմեն նախաձեռնությանը` ներկայացնելով իրենց հիվանդության նախապատմությունը, նախաձեռնողները, իրենց հերթին, կդիմեն համապատասխան բուժհաստատություններ` հիվանդի առողջական վիճակի մասին ստույգ տեղեկություն ստանալու համար: Հիվանդի մասին պատրաստված նյութը՝ տեսանյութով ու համապատասխան նկարով հրապարակվելու է ցանցում և տարածվելու է համացանցում: Նախաձռենության համահիմնադիր Լուսինե Սաղումյանն էլ հավաստիացրեց, որ ամբողջ գործընթացի հետ կապված ցանկացած քայլ լինելու է հրապարակային եւ թափանցիկ, հույս հայտնեց, որ ֆիլմում իրագործված գաղափարը կիրականանա նաեւ մեզ մոտ. յուրաքանչյուր անձ, ով օգնություն կստանա, նախաձեռնության շրջանակներում, ի պատասխան դրա`կփորձի օգնել երեք այլ մարդու, այդ երեքից յուրաքանչյուրն էլ իրենց հերթին կփորձեն օգնել երեք այլ` օգնության կարիք զգացող մարդկանց, այդպես շղթան շարունակվելու է:
Նախաձեռնությունն արդեն իր մեկնարկն ապրել է, ծրագրի իրականացմանն աջակցում են «Sprin Group» փիար ընկերությունը եւ X-tech-ը, կամավորների կարիք բարեգործական շարժումը միշտ էլ կզգա: Գաղափարի իրագործմանը լծված մարդիկ չեն ցանկանում կասկածել` «Ես քեզ, դու` ուրիշին» «սցենարը» կգործի նաեւ մեր հասարակությունում:
Հ. գ. Ֆիլմի ավարտից հետո տեղի ունեցավ հանգանակություն` նեյրոլեյկոզով հիվանդ 6-ամյա Նարեկ Մարտիրոսյանի բուժմանն օգնելու նպատակով:
