ԼՂՀ նախկին արտաքին գործերի նախարար Արման Մելիքյանի գնահատմամբ, նախընտրական շրջանում գործող իշխանության թեկնածուն՝ ՀՀ նախագահ Սերժ Սարգսյանը լավագույն դիրքերում է: «Մեր քաղաքական համակարգին նոր որակ է անհրաժեշտ, բայց գործող իշխանությունն այդ որակը ապահովելու ունակ չէ: Իշխանական վերնախավի ցուցադրական փորձերը քաղաքացիներին հավատացնելու, թե իշխանությունը պատրաստ է գնալ կտրուկ փոփոխությունների, կադրային ջարդ իրականացնել, ապարդյուն են լինելու, որովհետեւ ոչ թե ձուկն են գլխից բռնել, այլ գործն են սխալ բռնել: Անհրաժեշտ են խորքային փոփոխություններ, որոնք այս իշխանությունը չի կարող իրականացնել » ,- այսօր ասուլիսում ասաց պարոն Մելիքյանը:
Նրա դիտարկմամբ, «Բարգավաճ Հայաստան» կուսակցությունը քաղաքական որակներով չի տարբերվում իշխող կուսակցությունից. «Այն, որ իշխանական թեւը ճեղքվեց երկու մասի, դեռ չի նշանակում, որ իշխանությունից հեռացած քաղաքական ուժը ձեռք է բերել նոր քաղաքական որակներ: Ամեն ինչ ցույց է տալիս, որ առայժմ այդ որակները դեռ ձեռք բերված չեն» : Պարոն Մելիքյանի կարծիքով, Հայաստանում հիմնական ընդդիմադիր ուժերը թուլացել են ու գնում են տրոհման ճանապարհով. «Նախկինում ակտիվ ընդդիմադիր կեցվածք որդեգրած կուսակցությունները սպառել են իրենց քաղաքական պոտենցիալը , սպառել են խորհրդարանական ընտրությունների արդյունքները ընդունելով ու գլխիկոր հայտնվել խորհրդարանում : Սա նրանց հաղթանակի միակ ու վերջին պտուղն է այս փուլում: Այն վիճակում են, որ ԲՀԿ-ին դիտարկում են ավագ եղբայր»:
Պարոն Մելիքյանի համար անհասկանալի է ԲՀԿ-ի ընդդիմադիր կեցվածքը: Նա հիշեցրեց, որ ԲՀԿ-ն, ստորագրելով Սերժ Սարգսյանին սատարելու պարտավորագիրը, դեռեւս հակառակի մասին հայտարարություն չի արել:
Կարդացեք նաև
Անդրադառնալով ընդդիմության միասնական թեկնածուի հնարավորությանը, պարոն Մելիքյանն ասաց, որ չի գտնում, թե ընդդիմության թեկանծուն անգամ արդար ընտրությունների դեպքում կկարողանա հաղթել իշխանությանը.«Ընդդիմության մեջ շատ է նեղացածությունը, փոխադարձ մեղադրանքները: Միակ շանսն այն է, որ լինի չեզոք անձ, որը ունենա անցած քաղաքական լուրջ ճանապարհ ու ընկալելի լինի քաղաքական ուժերի համար ու հավասարապես հեռու լինի նրանցից: Այսօր ոչ Լեւոն Տեր Պետրոսյանը ոչ ԲՀԿ ից առաջադրվող հավանական թեկնածուներից որեւէ մեկը՝ նկատի ունեմ Գագիկ Ծառուկյանին կամ Օսկանյանին , թե Դաշնակցությունը միանձնյա չեն կարողանա որեւէ բան անել ու չունեն այն թեկնածուն, որ ընդունելի լինի բոլոր մնացածների համար»:
Հարցին, արդյոք առաջիկա նախագահական ընտրություններում ինքը կառաջադրվի, պարոն Մելիքյանն ասաց՝ վերջնական կպատասխանի առաջիկա ամիսներին :
Անդրադառնալով Օսկանյանի դեմ սկսված գործին, պարոն Մելիքյանն ասաց.«Հայաստանը իավական պետություն չէ: Ցանկացած մարդ քաղաքական հայացքնների համար կարող է քրեական հանցագործի պիտակ ստանալ իշխանությունների կողմից… Այս պատմության մեջ չկա իրավացի ու մեղավոր կողմ»:
Արփինե ՍԻՄՈՆՅԱՆ
