Տավուշի մարզի Գետահովիտ համայնքի մի խումբ բնակիչներ հոկտեմբերի 3-ին Մարդու իրավունքների պաշտպանի աշխատակազմի Տավուշի մարզային գրասենյակ էին դիմել` Աղստև գետի Պաղջուր վտակի վրա կառուցվող ՀԷԿ-ի կապակցությամբ, որն իրականացվում է առանց համապատասխան հասարակական
լսումների և ՀՀ օրենսդրության մի շարք խախտումներով: Ինչպես մեզ հայտնեց Մարդու իրավունքների պաշտպանի աշխատակազմի Տավուշի մարզային գրասենյակի իրավաբան Բենիկ Հարությունյանը, ՀՀ Մարդու իրավունքների պաշտպան Կարեն Անդրեասյանը բարձրացված խնդրով դիմել է բնապահպանության նախարարին` խնդրելով հնարավորինս սեղմ ժամկետներում համապատասխան կառույցներին հանձնարարել ուսումնասիրել խնդիրը, ներկայացնել տեղեկություններ իրավական հիմքերի չպահպանման վերաբերյալ: Համայնքի բնակիչները ՄԻՊ աշխատակազմի մարզային գրասենյակ են բողոքել,որ ՀԷԿ-ի կառուցման ժամանակ խախտվել են Օրհուսի կոնվենցիայի դրույթները, «Շրջակա միջավայրի վրա ազդեցության փորձաքննության մասին», «Բնության հատուկ պահպանվող տարածքների մասին», «Բուսական աշխարհի մասին», «Կենդանական աշխարհի մասին» օրենքներում ամրագրված դրույթները: Բնակիչները նաեւ դժգոհել են, որ հասարակական լսումները կատարվել են Ենոքավան համայնքում, այն դեպքում երբ կառուցվող «Խաչաղբյուր-2» ՓՀԷԿ-ի ազդեցությունն ամբողջությամբ տարածվում է Գետահովիտ համայնքի վրա:
Ոսկան ՍԱՐԳՍՅԱՆ
Կարդացեք նաև
