Եվրոպայի հայկական միությունների ֆորումի (ԵՀՄՖ) նախագահ Աշոտ Գրիգորյանը այս տարվա հուլիսին հայոց ցեղասպանությունը ժխտելու համար դատի էր տվել Սլովակիայում Թուրքիայի դեսպան Գյուլհան Ուլուտեկին եւ շահել դատը: Այսօր ասուլիսում նա ասաց, որ ինքը օգտվել է Սլովակիայում 2009-ից գործող ցեղասպանությունը ժխտելու համար պատիժ նախատեսող օրենքից, որով գիտակցաբար մերժողներին 5 տարվա ազատազրկում է սահմանված, իսկ ոչ գիտակցաբար մերժողներին՝ 3 տարվա ազատազրկում:
Պարոն Գրիգորյանի պատմելով` Սլովակիայում Թուրքիայի դեսպանը հոդված էր հրապարակել, որում նշել էր՝ հայոց ցեղասպանության մասին պետք է շատ զգույշ խոսել, որովհետեւ այն` որպես այդպիսին, կասկածի տակ է առնված ամբողջ աշխարհում: Դեսպանը նաեւ ասել էր՝ պետք է հիշել, որ առաջին համաշխարհային պատերազմի ժամանակ տեղի ունեցած այդ դեպքերի ընթացքում ավելի շատ թուրքեր են մահացել: Պարոն Գրիգորյանը հոդվածը կարդալուց հետո անմիջապես դիմել է գլխավոր դատախազություն՝ հայցով` պատասխանատվության ենթարկել թուրք դեսպանին.« Սլովակիայի ներքին գործերի նախարարությունը հանձնարարություն է ստանում գլխավոր դատախազից՝ թուրք դեսպանի նկատմամբ կիրառել պատիժը: Ես էլ պաշտոնական պատասխան եմ ստանում Սլովակիայի ոստիկանության բաժնից, որ նրանք ուսումնասիրել են գործը, բերման են ենթարկել դեսպանին: Դեսպանն էլ հայտարարել է, որ ինքը օրենքը չի խախտել, որովհետեւ ինքը հայոց ցեղասպանության դեմ ոչինչ չի ասել ու չի կարող ասել: Այսինքն, դե ֆակտո առաջին անգամ թուրք բարձրաստիճան պաշտոնյան, թուրք դիվանագիտության ամենաբարձր ներկայացուցիչը հայտարարում է, որ հայոց ցեղասպանությունը կասկածից վեր է, հակառակ դեպքում մինիմում նվազագույնը 3 տարվա ազատազրկման կդատապարտվեր»:
Արփինե ՍԻՄՈՆՅԱՆ
Կարդացեք նաև
