Լոռու մարզի ընդհանուր իրավասության դատարանը, նախագահությամբ դատավոր Մուշեղ Հարությունյանի, 7 տարվա ազատազրկման է դատապարտել ավազակություն կատարելու մեջ մեղադրվող Վ. Դումանյանին: Համաձայն մեղադրական եզրակացության՝ մեղադրյալը մի խումբ անձանց հետ նախնական համաձայնությամբ ավազակային հարձակում է կատարել քանդակագործ Գ. Թումանյանի վրա, նրանից հափշտակել զգալի չափերով գումար եւ թողնելով ուշագնաց վիճակում՝ մյուս անձանց հետ հեռացել բնակարանից: 33-ամյա վանաձորցու պաշտպան Գուրգեն Հարությունյանը մտադիր է բողոքարկել դատարանի կայացրած վճիռը: Նրա դիտարկմամբ` դատարանը խորամուխ չի եղել գործում առկա ցուցմունքների վրա` այդկերպ կայացնելով ակնհայտ ապօրինի դատավճիռ: Փաստաբանը համոզված է, որ թե նախաքննությունը, թե դատաքննությունը անցել են բազմաթիվ խախտումներով, տուժող Գ. Թումանյանն էլ թե նախաքննության, թե դատաքննության ընթացքում տվել է հակասական ցուցմունքներ: «Կայացվել է ակնհայտ ապօրինի դատավճիռ: Դատարանը չցանկացավ ցուցմունքների մի մասը կասկածի տակ դնել, քանի որ եթե մի մասը դներ, ապա ամբողջությամբ կասկածի տակ էին ընկնելու տուժողի տված ցուցմունքները: Տուժողը, որտեղ չէր կարողանում տրվող հարցերի պատասխանները տալ, դիմում էր մեղադրանքի կողմի համար փորձված մեթոդին` չեմ հիշում ու վերջ»,-ասում է փաստաբանը:
Գ. Թումանյանը նախաքննության ընթացքում ցուցմունք էր տվել այն մասին, որ Վ. Դումանյանը դեպքի օրը կանչել է նաեւ եւս երկու անձանց: Հետագայում, սակայն, փոխելով իր նախկինում տված ցուցմունքը, պնդել էր, որ չի կարող ասել` Վարդանն է այդ անձանց հրավիրել, թե ոչ, բայց ենթադրում է, որ նա է կանչել:
«Մենք վստահ ենք, որ այդ երկու անձինք չկան: Տուժողը սկզբում նշել էր, որ իրեն ծեծի են ենթարկել երեքով, հետագայում թե նախաքննական, թե դատաքննական ցուցմունքներով պնդեց, որ իբր թե երկուսը կանգնած են եղել, միայն մեղադրյալն է խփել իրեն»,-ասում է Գուրգեն Հարությունյանը: Վ. Դումանյանն էլ իր հերթին պնդում է, որ ինքը ավազակային հարձակում չի կատարել: «Ավազակային հարձակում, առավել եւս՝ ուրիշի գույքին տիրանալու փաստ տեղի չի ունեցել, քանի որ Գ. Թումանյանն է ինձ հրավիրել իր տուն՝ միասին խմելու նպատակով: Իմանալով, որ չեմ աշխատում, ինքն է ստիպողաբար ինձ գումար տվել: Իսկ այն, որ բացի ինձնից` էլի երկու հոգի են եղել նրա տանը, սուտ է», – ցուցմունքում ասել է Վ. Դումանյանը:
«Այսօր մեր փորձը, պրակտիկան ցույց են տալիս, որ դատարանները, կոպտորեն խախտելով օրենքը, ընդհանրապես հաշվի չեն առնում պաշտպանական կողմի ներկայացրած փաստարկները, ավելին՝ որեւէ ձեւ չեն փորձում հերքել դրանք իրենց կայացրած դատական ակտերում»,-բացատրում է փաստաբան Հարությունյանը:
Կարդացեք նաև
Անուշ Բուլղադարյան
Վանաձոր
