Այս մարդը հոգնա՞ծ է
Այսօր լրագրողները Շիրակի մարզպետ Աշոտ Գիզիրյանից համառորեն փորձում էին իմանալ, թե ո՞րն էր պատճառը, որ Վարդան Ղուկասյանը ժամկետից մեկ ամիս շուտ հրաժարական ներկայացրեց, ո՞վ ստիպեց նրան, վերևնե՞րը: «Ես էլ եմ մտածում` ո՞րն էր պատճառը, հարցը ուղղեք պարոն Ղուկասյանին», -խորհուրդ տվեց մարզպետը:
Երբ լրագրողները մեջբերեցին Վարդան Ղուկասյանի խորհուրդը, այն է` հարցնել վերևներից, Աշոտ Գիզիրյանը շարունակեց. «Ո՞ր վերևից, վերև Աստվածն է, իշխանության առումո՞վ վերևից, գիտեք ինչ, չեմ կարծում, որ պարոն Ղուկասյանին ինչ-որ մեկը պարտադրել է կամ ինչ-որ տեղ ուղղորդել է, որ նա պետք է հրաժարական տա, և ասեմ, որ պարոն Ղուկասյանը ճիշտ է արել, արդեն իսկ կա նորընտիր քաղաքապետ, որը պետք է անցնի իր պարտականություններին, իսկ պարոն Ղուկասյանը որոշել է մի ամիս էլ ավելի հանգստանա, ի՞նչ է եղել»: Իսկ հարցազրույցի վերջում, նորից հիշելով պարոն Ղուկասյանին, գեներալ մարզպետն ասաց. «Վարդան Ղուկասյանը 13 տարի աշխատելով, էդ մարդը իրոք հոգնել է, 13 տարի նույն քաղաքի քաղաքապետ լինելը իրոք հեշտ չէ , իհարկե շատ պատվաբեր աշխատանք է, բայց և հեշտ էլ չէ»: Նշենք, որ մի քանի օր առաջ Գյումրու տոնակատարության ժամանակ Վարդան Ղուկասյանն իր վերջին հաշվետու ելույթում նշեց, որ երբեք չհոգնեց աշխատելուց, որքան իր դեմ ուղղված դավերից, «սուտը իր վզովը կախողներից»:
Նունե ԱՐԵՎՇԱՏՅԱՆ
