Հոկտեմբերի 14-ին տեղի կունենան Վայոց Ձորի Արփի և Գլաձոր գյուղական համայնքների ղեկավարի ընտրությունների վերաքվեարկություններ: Այս երկու համայնքներում գյուղապետերի սեպտեմբերի 23-ի հերթական ընտրություններն անվավեր էին ճանաչվել:
Ընտրական օրենսգրքի համաձայն` hամայնքի ղեկավարի ընտրություններն անվավեր ճանաչվելու դեպքում, քվեարկության օրվանից 21 օր հետո, թեկնածուների նույն կազմով անցկացվում է վերաքվեարկություն: Ընդ որում, թեկնածուների նույն կազմով վերաքվեարկություն կարող է անցկացվել միայն մեկ անգամ:
Այսպիսով, Արփի համայնքում կվերաքվեարկվեն ՀՀԿ անդամներ` գործող գյուղապետ Գրիգոր Գրիգորյանը և Գագիկ Հովսեփյանը: Առաջինն առաջադրված է կուսակցության կողմից, երկրորդը` ինքնաառաջադրման կարգով:
Գլաձորում կվերաքվեարկվեն գործող գյուղապետ, ՀՀԿ-ի թեկնածու Անդրանիկ Մարտիրոսյանը և ինքնաառաջադրված անկուսակցական Արմեն Մովսիսյանը:
Կենտրոնական ընտրական հանձնաժողովի կայքէջում տեղադրված տվյալների համաձայն, Արփի համայնքում սեպտեմբերի 23-ի քվեարկության նախնական արդյունքներով գործող գյուղապետ Գրիգոր Գրիգորյանը և Գագիկ Հովսեփյանը համապատասխանաբար ստացել էին 347 և 344 քվեներ:
Գլաձորում գործող գյուղապետ Անդրանիկ Մարտիրոսյանը և ինքնաառաջադրված անկուսակցական Արմեն Մովսիսյանը ստացել էին 587-ական քվեներ:
