Գերմանիայի Էրֆուրթ քաղաքում հոկտեմբերի 5-10-ը կայացած «Խոհարարության համաշխարհային օլիմպիադայում» ոսկե մեդալներ են նվաճել հայուհիներ` Վերա և Ռենա Հովհաննիսյանները: Քույրերը հանդես են եկել Հայաստանի դրոշի ներքո և օլիմպիադային մասնակցել են որպես հրուշակագործներ` ներկայացնելով քաղցրեղենից պատրաստված աշխատանքներ:
Ինչպես Tert.am-ի հետ զրույցում պատմեց Վերա Հովհաննիսյանը, իրենք երկար ժամանակ է բնակվում են Մոսկվայում և այժմ զբաղված են հրուշակագործությամբ: Վերա Հովհաննիսյանը, ներկայանալով Ռուսաստանի կողմից, 2010 թ.-ին մասնակցել է նաև Լյուքսեմբուրգում կայացած խոհարարների աշխարհի գավաթին, 2011 թ.-ին Մալթայում ոսկե մեդալ է ստացել միջազգային մրցույթի ժամանակ:
Մինչ օլիմպիադան, Վ. Հովհաննիսյանը, դառնալով Հայ խոհարարների միության անդամ, խոստացել էր այդուհետ հանդես գալ հայկական դրոշի ներքո:
Խոհարարության համաշխարհային օլիմպիադան անցկացվում է 4 տարին մեկ անգամ և միջազգային մեծ հռչակ ունի: 2012 թվականին տեղի ունեցած օլիմպիադային ներկայացվել են ավելի քան 1000 խոհարարական ցուցանմուշներ, որոնք ներկայացվել են 33 երկրների կողմից: Խոհարարական արվեստի համաշխարհային «ցուցահանդեսին» մասնակցում էին 115 թիմեր և 300 անհատ խոհարարներ:
