Տեղի իշխանությունների եւ Ղ. Սարյանի անվան օպերային ստուդիայի ցանկությունները համընկնում են:
32-ամյա Երեւանի Կոմիտասի անվան պետական կոնսերվատորիայի Ղ. Սարյանի անվան օպերային ստուդիան «գրել» է հարուստ կենսագրություն եւ նվաճել հայաստանյան երաժշտական աշխարհում նոր, շնորհալի ուժեր ձեւավորող դարբնոցի համբավ: Իրենց բեմական մկրտությունն այստեղ ստացած երգիչ-երգչուհիներ լավագույնս ներկայացել եւ բեմ են բարձրանում ինչպես մեր, այնպես էլ աշխարհի տարբեր օպերային թատրոններում: Իբրեւ ինքնուրույն թատրոն, ստուդիան լրացնում է կամերային, օպերային ստեղծագործությունների պակասը մեր մշակութային կյանքում: Ստուդիան առաջին անգամ հայ հանդիսատեսին է ներկայացրել նույնիսկ աշխարհում հազվադեպ բեմադրված Պուչինիի «Ծիծեռնակը», «Սիրո ըմպելիք», «Եռապատում», Հայդնի «Դեղագործը» օպերային ներկայացումները: Տարիների ընդմիջումից հետո ստուդիայի շնորհիվ է, որ ականատեսը եղանք Դոնիցետիի «Լուչիա դի Լամերմուր» եւ Ռոսինիի «Սեւիլյան սափրիչը» օպերաներին: Ի վերջո, 2004թ. ապրիլի 21-ը Արցախի մշակութային օրացույցում թերեւս հիշվի որպես երկրորդ հայկական հանրապետության օպերային արվեստի սկզբնավորման օր, երբ ստուդիան ներկայացրեց Տիգրանյանի «Անուշը»: Այսքանով չեն ավարտվում Ղ. Սարյանի անվան օպերային ստուդիայի ձեռքբերումները:
Օրերս «Թատերական Լոռի» փառատոնի շրջանակներում Ալավերդիում առաջին անգամ ներկայացվեց օպերա՝ Պերգոլեզիի «Սպասուհին՝ տիրուհի»: Օպերային ստուդիայի գլխավոր ռեժիսոր Հովհաննես Հովհաննիսյանն (լուսանկարում) արժանացավ Տիգրան Լեւոնյանի անվան մրցանակի, իսկ Սերպինայի դերերգով հանդես եկած Նվարդ Հովակիմյանը՝ Թատերական գործիչների միության դիպլոմին: Նշենք, որ սա ստուդիայի առաջին ձեռքբերումը չէր. ժամանակին Իսպանիայում կայացած «Օպերան ժողովրդին» եւ հայաստանյան «Հայֆեստ» փառատոներում գնահատվել են ստուդիայի բեմադրությունները:
Կարդացեք նաև
Այսուհանդերձ, մասնագետներն ու օպերային արվեստի սիրահարները մտահոգված են, թե ինչու ստուդիան չի բացում նոր թատերաշրջանը: «Առավոտի» հետ հանդիպման ժամանակ ստուդիայի գլխավոր ռեժիսոր, կոնսերվատորիայի օպերային պատրաստման ամբիոնի վարիչ, պրոֆեսոր Հովհաննես Հովհաննիսյանն ասաց, որ հիմնական պատճառը նվագախումբը նոր ուժերով համալրելն է: «Աշնանը Հայաստանի երաժշտական կյանքը՝ ի թիվս միաժամանակ անցկացվող փառատոների, պարզապես եռում է: Ի վերջո, դա արվում է ունկնդրի համար, ով պետք է պարզապես հասցնի այցելել: Այս ամենին եթե գումարենք ստուդիայի ներկայացումները, կարծում եմ՝ մի տեսակ քաոս կստացվի. դասական արվեստի սիրահարը ֆիզիկապես չի կարող, նույնիսկ մեծ ցանկության դեպքում, ներկա լինել նույն օրվա ընթացքում մի քանի միջոցառումների: Մի խոսքով՝ մենք դեռ կբացվենք»,- հայտնեց պարոն Հովհաննիսյանը:
Ըստ տարածված խոսակցությունների, Հովհաննես Հովհաննիսյանն ու ստուդիայի գեղարվեստական ղեկավար Հովհաննես Միրզոյանը ձեռնամուխ են եղել Արցախում օպերայի թատրոն հիմնադրելուն: Մեր զրուցակիցը՝ պարոն Հովհաննիսյանը, այս առիթով նախ ասաց, թե իրենց գործունեությունը կարծես ապացուցում է այն, որ ի դեմս ստուդիայի՝ Հայաստանն էլ ունի օպերային «փոքր թատրոն», հետո էլ առանց մանրամասնելու հավելեց. «Արցախում օպերային թատրոն հիմնադրելն առայժմ մեր եւ տեղի իշխանությունների ցանկությունն է»: Հավելենք, որ «Անուշում» ընդգրկված էին Արցախի պետական երգչախումբը՝ Նինա Գրիգորյանի ղեկավարությամբ եւ խորեոգրաֆիկ ուսումնարանի սաները:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
