Սպիտակ քաղաքի մի շարք քաղաքացիներ Aravot.am-ին իրենց մտահոգությունը հայտնեցին այն կապակցությամբ, որ իրենք, ապրելով տնակային պայմաններում, ունեին քաղաքային հեռախոսահամարներ, այնինչ աղետի գոտու վերակառուցման պետական ծրագրի շրջանակներում նոր բնակարաններ ստանալուց հետո իրենք միչեւ այժմ չունեն քաղաքային հեռախոսահամարներ:
Մեզ հետ զրույցում նրանք պատմեցին, որ ժամանակին, երբ նոր՝ Վարպետաց թաղամաս են տեղափոխվել, իրենց տեղեկացվել է, թե կարող են պահպանել նախկին հեռախոսահամարները, և բնակիչները երկու տարի շարունակ վճարել են այդ հեռախոսահամարների ամսական վարձավճարները, բայց դեռ թաղամասը հեռախոսաֆիկացված չէ:
Aravot.am-ը այս հարցի կապակցությամբ պարզաբանումներ ստացավ «ԱրմենՏել» ընկերության հասարակայնության հետ կապերի ծառայության ղեկավար Անուշ Բեղլոյանից: Նա Սպիտակի քաղաքացիներին տեղեկացրեց. «Եթե նոր բնակարանները կառուցվեին տնակների նույն աշխարհագրական վայրում, ապա քաղաքացիների նույն հեռախոսահամարները կպահպանվեին: Բայց քանի որ նոր բնարականները կառուցվել են այլ վայրում, ապա այդ դեպքում ընկերությունը պարտավորված կլիներ հեռախոսաֆիկացնել տարածքը: Ընկերությունը տարածքը հեռախոսաֆիկացնում է աշխարհագրական սկզբունքով: Իսկ ըստ ժամանակացույցի՝ այդ աշխարհագրական վայրը դեռ ընդգրկված չէ ծրագրում»:
Կարդացեք նաև
Ա. Բեղլոյանը քաղաքացիներին խնդրեց, որպեսզի նրանք դիմեն ընկերությանը և ներկայացնեն կոնկրետ հեռախոսահամարները, որպեսզի ձեռնարկեն համապատասխան քայլեր, և տրվի անհրաժեշտ տեղեկատվություն:
Տաթև ՀԱՐՈՒԹՅՈՒՆՅԱՆ
