Երեկվանից առանձին լրատվամիջոցների մեկնաբանությունների տեղիք է տվել ասուլիսում «Հանրապետություն» կուսակցության անդամ Սուրեն Աբրահամյանի հնչեցրած այն կարծիքը, որ եթե Ռոբերտ Քոչարյանն առաջադրվի, կարելի է մտածել Սերժ Սարգսյանին սատարելու մասին: Պարոն Աբրահամյանի այս թեական պնդումը առիթ դարձավ ընդհուպ մինչև մեղադրանքների, թե կուսակցությունը ժամանակին խոսում էր փողոց դուրս գալու մասին, այնինչ հիմա դարձել է Սերժ Սարգսյանի կողմնակիցը:
Aravot.am-ի հետ զրույցում խոսելով իր՝ երեկ հնչեցրած դիրքորոշումների մասին, մասնավորապես իբր Ս. Սարգսյանին պաշտպանելու մասին կարծիքին, Ս. Աբրահամյանը պարզաբանեց. «Անկեղծ ասած՝ ուզում եմ ավելի բարձր կանգնել և այդ ամենը մեկնաբանել ոչ թե որպես դիտավորություն, այլ ուղղակի թյուրըմբռնում: Այն ես վերագրում եմ իբրեւ ընդհանուր օրվա տրամաբանությունից դուրս, թեմայի համատեքստից առանձին բան վերցնել-մեկնաբանելուն»:
Հստակեցնելու համար պարոն Աբրահամյանը շեշտեց. «Մենք արդեն պաշտոնական հայտարարություն արել ենք, որ «Հանրապետություն» կուսակցությունը ոչ մի ձևաչափով ոչ մի քաղաքական ուժի հետ մինչև դեկտեմբեր չի մտնելու գործարքների մեջ: Կուսակցության համագումարին քաղաքական իրավիճակը քննելուց հետո կորոշվի, թե սեփական թեկնածուո՞վ ենք գնում ընտրությունների, թե՞ սատարելու ենք որևէ մեկին, ընդ որում, միայն և միայն ընդդիմության դաշտում հանդես եկող թեկնածուի մասին է խոսքը: Չնայած իմ ցանկությունն է, որ սեփական թեկնածուով մտնենք ընտրապայքարի մեջ: Արդյոք մինչև այդ կարո՞ղ ենք համոզել Արամ Սարգսյանին՝ ժամանակը ցույց կտա: Ուստի ընտրությունների հետ կապված բոլոր կարգի խոսակցությունները՝ դեկտեմբերին»:
Կարդացեք նաև
Կրկին շահարկումներին անդրադառնալով՝ հետաքրքրվեցինք, թե իրականում պարոն Աբրահամյանը նման պնդում արե՞լ է, որ «Հանրապետությունը» չի բացառում Սերժ Սարգսյանի թեկնածությունը պաշտպանելը: Մեր զրուցակիցը պատասխանեց. «Ի սեր Աստծո, նման բան չկա: Այդտեղ խոսակցություն չի գնացել կուսակցության վերաբերյալ: Եթեներով հարցրեցին, որ եթե դիլեմա լինի՝ միայն Ռոբերտ Քոչարյանն ու Սերժ Սարգսյանը առաջադրվեն… Ես էլ պատասխանեցի, որ եթե Սերժ Սարգսյանն անձնապես իմ օգնության կարիքը զգա՝ Քոչարյանի դեմ կռվում, մտածելու բան է: Ընդամենը դա է, ոչ կուսակցության մասին է խոսք եղել, ոչ էլ քաղաքական դիրքորոշման: Ինչ շահարկում, ինչ բան, պարապ մարդիկ են»:
Պարոն Աբրահամյանը զրույցը եզրափակեց այսպես. «Նման պնդում, որ «Հանրապետություն» կուսակցությունը կսատարի Սերժ Սարգսյանին, չի եղել: Տեսագրությունը նայեք»:
Տաթև ՀԱՐՈՒԹՅՈՒՆՅԱՆ
