Այսօր ԵԽԽՎ պատվիրակության անդամներն այսօր ԱԺ-ում հրավիրած ասուլիսում ներկայացրեցին, թե ինչ հարցեր են քննարկվել այնտեղ ու ինչ արձագանքներ են ստացել: Պատվիրակության ղեկավար Դավիթ Հարությունյանը քաղբանտարկյալների սահմանման հարցի քվեարկությունից հետո եւս մեկ անգամ համոզվել է, որ ԵԽԽՎ-ն արժեքների կազմակերպությունից դարձել է շահերի կազմակերպություն. «Դա ակնհայտ դարձավ ընդամենը մեկ պատճառով, որ այն հավաքեց 89 կողմ եւ 89 դեմ ձայներ»:
Պատգամավորները նաեւ նշեցին, որ հատկապես թեժ քննարկում է ծավալվել ԱԺ փոխնախագահ Հերմինե Նաղդալյանի զեկույցի շուրջ, որտեղ անդրադարձ է եղել հետճգնաժամային խնդիրներին, ճգնաժամի պատճառներին եւ մի շարք այլ խնդիրներին:
ԵԽԽՎ-ում պատվիրակության երկու անդամներ՝ Վահե Հովհաննիսյանը եւ Նաիրա Զոհրաբյանը հայտարարել են, որ իրենց անդամությունը պատրաստ են պարոն Օսկանյանին զիջելու՝ հաշվի առնելով, որ նա ավելի պաշտպանված կլինի: Լրագրողների խնդրանքով մեկնաբանելով այս հայտարարությունը՝ Դավիթ Հարությունյանն ասաց. «Սա իրենց քաղաքական ուժի իրավունքն է: Որոշել են՝ թող անեն: Սա իրենց գործն է: Սա այն հարցն է, որը պետք է բաց քննարկվի. ով է մեղավոր՝ դա կլինի իրավապահ մամինները, դա կլինի պարոն Օսկանյանը: Ես չեմ կարծում, որ պարոն Օսկանյանը կգնա այդ քայլին, որովհետեւ նա քաղաքական գործիչ է եւ նրա համար ավելի կարեւոր են, կարծում եմ, քաղաքական քայլերը, քան ինչ-որ պաշտպանությունը»: Այնուամենայնիվ, Դավիթ Հարությունյանն ասաց, թե այն, որ Վարդան Օսկանյանի հարցը լինելու է ԵԽԽՎ ուշադրության կենտրոնում՝ միանշանակ է:
Կարդացեք նաև
Հռիփսիմե ՋԵԲԵՋՅԱՆ
