Քաղաքագետ Արմեն Աղայանի գնահատմամբ` առաջիկա նախագահական ընտրություններում պայքարն ընթանալու է ՀՀ նախագահ Սերժ Սարգսյանի եւ ԲՀԿ թեկնածուի միջեւ: «Լեւոնական ընդդիմությունը մահացած է: Նա վաղուց էր մահացել, ուղղակի դրա մասին քչերը գիտեին, հիմա բոլորը ակնհայտ տեսնում են: Մյուս ընդդիմության ձեւաչափերը, որ երբեւիցէ գոյություն են ունեցել՝ Դաշնակցություն, «Ժառանգություն», դրանք չկան, համարյա լուսանցքային վիճակում են: Հետեւաբար շարունակվում է նույն երեւույթը, որ Հայաստանի գործող իշխանությանը ձեռնոց է նետում միայն երեկվա իշխանությունը, որովհետեւ միայն նա ունի դրա ֆինանսական ռեսուրսները եւ ինչ-որ կազմակերպչական կապեր է պահել վերնախավային շերտերում, բիզնես շրջանակներում: 2-րդ տեղի թեկնածուին Ռոբերտ Քոչարյանն է որոշելու, կարող է անձամբ առաջադրվի, հնարավոր է Օսկանյանին կամ Ծառուկյանին առաջադրի կամ էլ այլ թեկնածու»,- Aravot.am-ին ասաց պարոն Աղայանը:
Նրա խոսքերով, իշխանություններին հաջողվեց փչացնել նախկին արտգործնախարար Վարդան Օսկանյանի իմիջը. «Վարդան Օսկանյանը որպես Քոչարյանի գործիք էր շրջանառության մեջ էր դրվել: Այդ ֆիգուրը Քոչարյանին ձեռնտու էր, որովհետեւ ինքը չէր կարող ընդդիմադիր զանգվածին գրավել. հռետոր չէ, մարտի 1 կա նրա վզին: Իսկ Օսկանյանը ամերիկյան իր իմիջով, խոսելաոճով, իր «Սիվիլնեթով» կարող էր ընկալվել որպես կոմպրոմիսային ֆիգուր, որին համ ԲՀԿ-ին փողով ընտրողները կքվեարկեին, համ էլ այն ընդդիմադիրները, որոնք ուրախանում էին, որ «Սիվիլնեթը» պաշտպանում է էկոլոգիական կամ Վահե Ավետյանի հետ կապված շարժումները: Իշխանությունները սա նկատեցին ու որոշեցին փչացնել այդ կերպարը: Ի՞նչ ազգային գործիչ ես, երբ օտար աղբյուրը քեզ միլիոնով ֆինանսավորում է: Բացի դրանից, իշխանությունները Ռուսաստանին ցույց տվեցին, թե` տեսեք, ձեր ընկեր Քոչարյանը ինչ ամերիկամետ գործիչով է խաղում, իսկ Ամերիկային էլ ցույց տվեցին, թե ձեզ միայն թվում է, որ Օսկանյանը ձեր տղան է, նրա հետեւում Քոչարյանն է: Օսկանյանի ֆիգուրը ժամանակից շուտ բացասական երանգով շրջանառության մեջ դնելով՝ շատ խաղաքարտեր խառնեցին իրար»:
Պարոն Աղայանը չբացառեց, որ Օսկանյանը խելոք վարվելու դեպքում կարող է իր դեմ սկսված հետապնդումից օգուտով դուրս գալ.«Մյուս կողմից իշխանությունները իրենց ձեռքում պահում են Օսկանյանին ծայրահեղ դեպքում խաղից շատ կոպիտ հանելու հնարավորությունը՝ ձերբակալելու կամ այլ ձեւով: Այլ հարց է, որ նա, իհարկե, ընդդիմադիր չէ, որովհետեւ չկա մի հարց հայ ժողովրդի ներկային, ապագային վերաբերող, որ Օսկանյանն ու Սերժ Սարգսյանը տարբեր կարծիք ունենան: Այսօր նրանք բոլոր հարցերով նույն կերպ են մտածում , նույն դիրքորոշումն ուննեն, պարզապես իշխանության կռիվ է: Մարդիկ խաղից դուրս են հայտնվել, ուզում են վերդառանալ խաղի, իսկ աթոռները քիչ են: Նորից կրկնեմ, որ այսօրվա հիմնական առճակատումը, ինչպես միշտ, դարձյալ նախկին ու ներկայիս իշխանավորի միջեւ է: Ուղղակի նախկին իշխանավորի դերում հիմա Լեւոն Տեր-Պետրոսյանը չէ, Քոչարյան Ռոբերտն է»:
Արփինե ՍԻՄՈՆՅԱՆ
Կարդացեք նաև
