«Իշխանական դաշտում 54,3%-ով առաջատար է Սերժ Սարգսյանը, իսկ ընդդիմադիր դաշտում` ԲՀԿ առաջնորդ Գագիկ Ծառուկյանը` 8,9%-ով»,- այսօր լրագրողների հետ հանդիպմանը առաջիկա ՀՀ նախագահական ընտրությունների մասին իրենց կատարած ուսումնասիրությունների արդյունքները ներկայացրեց «Սոցիոմետր» կենտրոնի տնօրեն, սոցիոլոգ Ահարոն Ադիբեկյանը:
Կենտրոնը հարցումը կատարել է սեպտեմբերի 15, 16-ին և 21, 22-ին, բոլոր մարզերի 3250 ակտիվ ընտրողների շրջանում՝ համաչափ՝ ըստ սեռի, տարիքի, կրթության, բնակավայրի: Ըստ կենտրոնի հարցումների տվյալների` ընդդիմադիր դաշտում մյուս հավանական թեկնածուների շանսերը հետևյալ կերպ են գնահատվում. Րաֆֆի Հովհաննիսյան՝ 1,8%, Լևոն Տեր- Պետրոսյան՝ 0,6%, Վահան Հովհաննիսյան՝ 1,0%, Արմեն Ռուստամյան՝ 0,1%:
Aravot.am-ը ներկայացված տվյալների մասին մեկնաբանություններ ստացավ «Հայկական սոցիոլոգիական ասոցիացիայի» նախագահ, սոցիոլոգիայի դոկտոր, պրոֆեսոր Գևորգ Պողոսյանից: Նա նշեց. «Այս շրջանում շատ շուտ է ինչ-որ տվյալներ տպագրելը, քանի որ ուսումնասիրությունները ցույց են տվել, որ մեր ընտրազանգվածը վերջին մեկ- երկու ամիսներին է մոբիլիզացվում: Իսկ իրական պատկերը մենք կստանանք, երբ թեկնածուներն առաջադրվեն և ավելին, մոտ մեկ ամիս ընտրարշավը գնա, և մարդիկ վերջնականապես կարողանան իրոք կողմնորոշվել, իհարկե նրանք, ովքեր կողմնորոշվում են: Հիմա նման հարցումներ անցկացնելն ու տպագրելը պարզապես հանրության ուշադրությունը գրավելու միջոց է, ուրիշ ոչինչ: Միևնույն է, հիմա ռեալ պատկերը ցույց տալ չեն կարող»:
Կարդացեք նաև
Ըստ Ա.Ադիբեկյանի կենտրոնի կատարած ուսումնասիրությունների` Գ. Ծառուկյանը «բարի լիդեր է»: Գ. Պողոսյանից հետաքրքրվեցինք` իրենց կատարած ուսումնասիրությունները նման արդյունք արձանագրե՞լ են: Նա պատասխանեց. «Այդպիսի հարցադրումներ չենք անում, այդ դեպքում մնացած բոլորի մասին էլ պիտի հարցնել, թե նրանք բարի են, քաղցր են, չոր են, թթու են…դա առանձին հատուկ ուսումնասիրություն պիտի արվի, որի իմաստը անհասկանալի է: Չեմ հասկանում, թե Ահարոնին ո՞վ է պատվեր տալիս այս ամիսներին նման ուսումնասիրություն անցկացնելու համար: Սոցիոլոգիան բավականին թանկ հաճույք է, չեմ կարծում, որ մարդիկ իրենց հաշվին դա անեին: Մյուս կողմից էլ՝ այսքան շուտ ոչ ոք, ոչ մի կուսակցություն նման ուսումնասիրություն չէր պատվիրի: Իսկ եթե ինքնուրույն ցանկություն է ունեցել կազմակերպելու նման հարցումներ, ապա դա շատ մեծ ծախսերի հետ է կապված ու անիմաստ ծախս է: Կարելի է տարին մեկ անգամ անել, բայց մի քանի անգամ, արդեն կասկածելի է»:
Պարոն Պողոսյանը Ա. Ադիբեկյանի ներկայացրած թվերը չմեկնաբանեց ու հավելեց. «Թվերը չեմ էլ ուզում քննարկել, քանի որ ժամանակավրեպ են: Կարող է դրանք արտահայտում են հասարակության մի փոքր հատվածի կարծիքները, բայց հասարակության կարծիքը հնարավոր կլինի պարզել ավելի ուշ»:
Տաթև ՀԱՐՈՒԹՅՈՒՆՅԱՆ
