Երկու անգամ գրավոր դիմել ենք Տավուշի մարզպետ Արմեն Ղուլարյանին՝ խնդրելով տրամադրել այն անձանց ցանկը, ովքեր իր կողմից արժանացել են «Պատվավոր տավուշցի» կոչման: Սակայն մարզպետը չի տրամադրել այդ ցանկը:
Տավուշի մարզպետարանի մեր աղբյուրի վկայությամբ` մարզպետը չի տրամադրում, որովհետեւ «Պատվավոր տավուշցի» կոչմանն արժանացածների թվում է նաեւ Գագիկ Ծառուկյանը:
Ինչպես տեղեկացնում է մարզային «Տավուշ» թերթի 2009 թվականի առաջին համարը, մարզպետն Այրում քաղաքի Սուրբ Հովհաննես եկեղեցու կառուցման եւ Տավուշի մարզի սոցիալ-տնտեսական զարգացմանն աջակցելու համար «Պատվավոր տավուշցի» կոչում է շնորհել եւ մեդալ հանձնել Գագիկ Ծառուկյանին:
Կարդացեք նաև
2012թ. hոկտեմբերի 4-ին Բերդի տարածաշրջանի Արծվաբերդ գյուղում հանդիսավորությամբ բացվել է արտերկրում ապրող արծվաբերդցիների կառուցած խաչքար: Բացման արարողությանը մասնակցել եւ շնորհավորանքի խոսք է ասել նաեւ մարզպետ Արմեն Ղուլարյանը: Խաչքարի բացման ժամանակ ելույթ է ունեցել եւ Գագիկ Ծառուկյանի անունից շնորհավորանք հնչեցրել դերասան Վովա Կոստանյանը:
Արծվաբերդի մեր աղբյուրները հայտնում են, որ դա դուր չի եկել Արմեն Ղուլարյանին, որը չի մնացել խաչքարի բացումից հետո կայացած համերգին եւ քեֆին, ասելով, որ ինքը Ջերմուկ՝ գյուղական համայնքների երկրորդ համաժողով է մեկնում:
Նշենք, որ այդ համաժողովը մեկնարկել է հաջորդ օրը՝ հոկտեմբերի 5-ին: Հավելենք, որ Արծվաբերդի օրերս վերընտրված գյուղապետը ԲՀԿ անդամ Վոլոդյա Ուզունյանն է:
Ոսկան ՍԱՐԳՍՅԱՆ
