Այսօր ՀՀ վարչապետ Տիգրան Սարգսյանը այցելեց Շիրակի մարզի Մարալիկ քաղաք` պետական միջոցներով կառուցված սոցիալական թաղամասի 59 բնակարանների բացման արարողությանը մասնակցելու: Նշենք, որ նորակառույց այս թաղամասում ապրելու են հանրապետության սոցիալական տարբեր խմբեր ունեցող կարիքավոր մարդիկ. այդ թվում նաև մանկատան չափահաս դարձած սաները: Մի խոսքով, սա հավաքածու բնակիչներով թաղամաս է լինելու: Եվ մինչ վարչապետը Գյումրիից կհասներ Մարալիկ, տարբեր բողոքներ ունեցող մարդիկ, նամակները ձեռքներին, սպասում էին կառավարության ղեկավարին: Վարչապետն այս անգամ կանգնեց, հատ-հատ լսեց ամեն մեկին, նույնիսկ իրենից հարցազրույց խնդրող լրագրողներին դիտողություն արեց` ասելով. «Ձեզ հետ ամեն օր շփվում եմ էլի, մի օր էլ թողեք մարդկանց հետ շփվեմ»:
Բողոքների մեծ մասը ոչ մարդավայել կենցաղային պայմաններից էին. ասենք 9 հոգով ապրում են երկու սենյականոցում, կային մարդիկ, որոնք 23 տարի շարունակ ապրում են երկաթյա վագոնում, մի խոսքով նրանք կառավարության ղեկավարից տուն էին պահանջում: Թերևս տարբեր էր մի տարեց կնոջ բողոքը: Նա, մոտենալով Տիգրան Սարգսյանին, իր խոսքը սկսեց նրա մասին գրած բանաստեղծությամբ.
Տիգրան Մեծին նմանվես
Կարդացեք նաև
Հայաստանը դարձնես ծովից ծով ,
էդ ժամանակ Հայաստանում
չի լինելու ոչ պատերազմ,
ոչ արտագաղթ, ոչ հացի սով :
Բանաստեղծությունն արտասանելուց հետո տիկինը գեղեցիկ առանձնատան մի լուսանկար ցույց տվեց` վարչապետին առաջարկելով վերջինիս վերակառուցումը ավարտել ու այնտեղ Մարալիկի հիվանդանոցը կամ մանկապարտեզը տեղափոխել: Նա ասաց, որ այդ կառույցի հեղինակները իր որդիներն են եղել, որոնք մահացել են, և ուզում է նրանց հիշատակը հավերժացնել: Վարչապետը, շոյված բարեգործ տիկնոջ վերաբերմունքից, փոխմարզպետ Սեյրան Պետրոսյանին անմիջապես հանձնարարեց հետաքրքրվել, թե ի՞նչ կարելի է դարձնել կառույցը: Սակայն տիկինը շեշտեց, որ սա հենց այնպես չի նվիրում, բանակում թոռ ունի, և կառավարության ղեկավարից ակնկալում է իր հատկացված մեկ սենյականոցը ընդլայնել, որպեսզի կարողանա թոռի հետ ապրել:
Երկրորդ խմբի հաշմանդամ մի տղամարդ էլ` Գագիկ անունով, հեռվից հեռու վարչապետին բողոքեց, որ իր դուստրը`Խաչատրյան Արմինան, ԵՊՀ-ի ռուս բանասիրության ֆակուլտետ է տվել իր գործերը, սակայն 1 բալի տարբերությամբ չի ընդունվել: «Գիտե՞ք պատճառն ինչ է, հարգելի վարչապետ, ես Ռուսաստանում էի, բայց իմ կինը գրպանը լիքը չէր գնացել»: Վարչապետը սկսեց համոզել, որ ընդունելությունն անցել է անկաշառ , և իրենք նման բողոք չեն լսել: «Մենք չունենք էդպիսի դեպք, որ անարդար ձևով երեխային դուրս թողնեն քննությունից»: Տեսնելով, որ բողոքավորը դեռ երկար է շարունակելու, իր օգնականին հանձնարարեց բողոք-նամակը վերցնել, հարցերն էլ կրթության նախարարի հետ լուծել:
Ինչևէ, վարչապետին այսօր բողոքախեղդ արեցին`միմյանց հերթ չտալով ու անգամ հետևից գոռալով` «էդ որ գալիս սոցիալական թաղամաս եք հիմնում անառողջ մարդկանց համար, լավ եք անում, բայց մի հիվանդանոցն ի՞նչ է, որ Մարալիկի գլխից կտրեցիք»:
Նունե ԱՐԵՎՇԱՏՅԱՆ
