«Եթե ընդունենք օրենք, որ, օրինակ, թիկնապահները պետք է լիցենզավորվեն, երեւի հարյուրավոր թիկնապահներ կլքեն երկիրը: Նրանք Հայաստանում գործ չեն ունենա, կգնան գործ փնտրելու այլ երկրներում: Արդյունքում չգիտենք մեր հանրապետությունը կուժեղանա՞, թե՞ կթուլանա: Հայաստանը գտնվում է վատ վիճակում, տարբեր կողմերից ունենք մեզ հակասող պետություններ, վաղը կարող է ընդհարում լինել,ու մեզ պարապած ջահելներ պետք գան»,- այսօր ասուլիսի ժամանակ, անդրադառնալով «Պահնորդության մասին» ՀՀ օրենքի ընդունմանը, մտավախություն հայտնեց «Պահապան արծիվ» թիկնապահական ակադեմիայի տնօրեն Արսեն Դավթյանը:
Ըստ նրա` նոր օրենքով նախատեսվում է կրճատել թիկնապահների թիվը, թիկնապահական ծառայությունն էլ դառնալու է ոստիկանությանն առընթեր ծառայություն, այսինքն` թիկնապահը գործատուի ինֆորմացիան պետք է տրամադրի նաեւ ոստիկանությանը: Սա պարոն Դավթյանի համոզմամբ, գործատուների սրտով հաստատ չի լինի: Պարոն Դավթյանը մտավախություն ունի, որ շատ գործատուներ հնարավոր է օրենքով նախատեսված 3 թիկնապահի փոխարեն շատ թիկնապահներ պահեն. «Մեկը կարող է ունենալ 7 թիկնապահ, որոնցից 3-ն ունենան լիցենզիա, իսկ մյուս 4-ին մասաժիստ կամ մեկ այլ բան ներկայացնեն: Առաջին հերթին մենք պետք է կայունացնենք մեր պետությունը, հետո մտածենք՝ թիկնապահներ պետք է ունենա՞նք, թե՞ ոչ: Օրինակ՝ զարգացած երկրներում այդպես է. ոչ մի վարչապետ կամ այլ ղեկավար անձ չունի թիկնապահ»:
Անդրադառնալով «Հարսնաքար»-ի դեպքին ու թիկնապահների գործողոթյուններին՝ նա ասաց` սխալ է մեկի պահվածքով բոլորի մասին կարծիք կազմել. «Գյուղ չկա, որ շուն չլինի: Նման պահվածք ունեցող թիկնապահներն հիմնականում նրանք են, որոնք սպորտում հաջողություն չեն ունենում ու փորձում են թիկնապահ լինել եւ գնում են ծանոթների մոտ աշխատանքի ընդունվում»:
Արփինե ՍԻՄՈՆՅԱՆ
