Եկմալյան փողոցին հարող տարածքի կառուցապատման ավարտի վերջնաժամկետը 2016 թ. հունվարի 1-ն է
Հոկտեմբերի 6-ին ուժի մեջ է մտել ՀՀ կառավարության 2008թ. նոյեմբերի 20-ի որոշման մեջ փոփոխություն կատարելու և Երևան քաղաքի գլխավոր պողոտայի` Եկմալյան փողոցին հարող տարածքի նկատմամբ բացառիկ`գերակա հանրային շահ ճանաչելու մասին որոշումը: Կառավարությունը լիազորել է քաղաքապետին որոշումն ուժի մեջ մտնելուն հաջորդող յոթ օրվա ընթացքում այն պատշաճ ձևով ուղարկել օտարվող սեփականության սեփականատերերին և օտարվող սեփականության նկատմամբ պետական գրանցում ունեցող գույքային իրավունքներ ունեցող անձանց:
Կառավարության սեպտեմբերի 6-ին ընդունված այս որոշմամբ, նշված տարածքի նկատմամբ ճանաչվել է բացառիկ` գերակա հանրային շահ, մասնավորապես, այն հիմնավորմամբ, որ այդ տարածքում քաղաքաշինական ծրագրի իրականացման շահը գերակայում է օտարվող սեփականության սեփականատերերի շահերից, և ծրագրի արդյունավետ իրականացումը չի կարող ապահովվել առանց նշված սեփականության օբյեկտների օտարման:
Որոշմամբ սահմանվում է, որ նշված տարածքը ձեռք բերողը Հայաստանի Հանրապետությունն է, որի անունից հանդես է գալիս Երևանի քաղաքապետը: Նրան են պատվիրակված նախատեսված օտարման գործառույթների իրականացման համակարգման և սեփականության օտարման գործառույթների իրականացման համար պատասխանատու պետական լիազոր մարմնի գործառույթները:
Սեփականության օտարման գործընթացն սկսելու վերջնաժամկետը 2015 թ.-ի հունվարի 1-ն է:
Երևանի քաղաքապետը լիազորված է անցկացնել հասարակության և պետության կարիքների համար օտարվող սեփականությունը ձեռք բերողի հրապարակային սակարկություն` մրցույթ, հետևյալ նվազագույն պայմաններով.
-կառուցապատման ավարտի ժամկետ սահմանել մինչև 2016 թ. հունվարի 1-ը,
-սահմանել կառուցապատման հարկայնությունը՝ 0.0 նիշից բարձր՝ 12-14 հարկ,
-տարածքը ձեռք բերողն ստանձնում է նաև տարածքի նախկին ձեռք բերողներ Գագիկ Պապոյանի և «Նարեկգրադ» ՍՊԸ-ի կողմից կադաստրային գրանցում ստացած՝ օտարման գործընթացի հետևանքով առաջացած և չկատարված հատուցման պարտավորությունները, ինչպես նաև նախնական առուվաճառքի պայմանագրերով գնորդների վճարած գումարները վերադարձելու պարտավորությունը` ՀՀ վարչապետի 2012 թվականի մարտի 2-ի «Միջգերատեսչական հանձնաժողով ստեղծելու մասին» N 194-Ա որոշմամբ ստեղծված միջգերատեսչական հանձնաժողովի կողմից որոշված իրավատերերի կազմով և չափերով,
-տարածքը ձեռք բերողը պարտավոր է շենքի կառուցման ավարտից հետո Երևան համայնքին սեփականության իրավունքով տրամադրել բնակելի տարածքներ` «Գապբնակշին» ՍՊԸ-ի կողմից կրկնակի վաճառքներից տուժած անձանց որպես օգնություն տրամադրելու համար:
