Pan Armenian Photo
Տիկնիկային թատրոնի գեղարվեստական ղեկավար Ռուբեն Բաբայանին զարմացրել է ԱԳՆ-ի շենքի վաճառքի շուրջ ծագած աղմուկը: «Արտաքին գործերի նախարարությունը տեղափոխվում է ուրիշ տեղ, հո շենքը չի տեղափոխվում: Թող տեղափոխվի, ինչքան շուտ տեղափոխվի, այնքան՝ լավ: Ես կցանկանայի, որ բոլոր գերատեսչությունները վերանային քաղաքի կենտրոնից՝ դատարաններ, վարչություններ: Սա մայրաքաղաք է, կենտրոնը պետք է լինի մշակութային ու հարմար զբոսաշրջիկների համար: Արտաքին գործերի նախարարությունը, ցավոք, տեղափոխվում է մի քանի 100 մետր այն կողմ, կարծում եմ, որ այդ փողոցը ահավոր ծանրաբեռնված է լինելու:
Գործի առումով հաճախ եմ լինում մշակույթի նախարարությունում, ես խղճում եմ այդ մարդկանց, այնտեղ աշխատել հնարավոր չէ: Ամեն մի սենյակում 10-15 հոգի են նստած: Տարեք Հարավարեւմտյան թաղամաս, համ էլ նախարարները կտեսնեն, թե ինչ է կատարվում արվարձաններում» , – այսօր «Հայելի» ակումբում հրավիրված ասուլիսում ասաց պարոն Բաբայանը:
Նրա կարծիքով, քաղաքի հենց կենտրոնում պետք է լինեն հյուրանոցներ, պատկերասրահներ, թանգարաններ, բայց Երեւանը սխալ է կառուցված. «Մենք գավառական մտածողություն ունենք, սխալ ենք կառուցում մայրաքաղաքը: Այստեղ ենք կենտրոնացնում սուպերմարկետները, դրանք պետք է լինեն արվարձաններում: Ամբողջ Հայաստանն աչքաթող է արված, սա մայրաքաղաք չէ, անճոռնի քաղաք է, որտեղ ապրում է Հայաստանի բնակչության ուղիղ կեսը»:
Ասուլիսին մյուս մասնակցին՝ հուշարձանագետ Սամվել Կարապետյանին էլ հետաքրքրում է՝ նախատեսված հյուրանոցը արդյոք մատչելի՞ է լինելու տարբեր խավի զբոսաշրջիկների համար. «Մեր հյուրերը մի խավից չեն: Արդյոք զբոսաշրջիկի համար ընտրության հնարավորություն կլինի՞: Մեր երկիրն այդ ընտրության հնարավորությունը դեռ չի տալիս: Մի ուրիշ հարց էլ կա, ճի՞շտ է, որ երկրի սրտի՝ հրապարակին հարող շենքերի համարյա կեսը լինի հյուրանոց»:
Կարդացեք նաև
Արփինե ՍԻՄՈՆՅԱՆ
